atuakkiortut
Allatta 2040 Reykjavikkimi
Reykjavikimi atuakkiortut workshoppertoqarneranut peqataassapput
Ålandimiut, Islandimiut Savalimmiuneersullu peqatigalugu kalaallit atuakkiortui inuusuttut atuakkiornermik workshopertitsisoqarnerani peqataassapput septembarip qulinganit 14-at ilanngullugu.
Inuusuttut siunissamut takorluugaat paasiniarlugu taamatut workshopertitsisoqassaaq.
- Workshoppertitsineq nutaarpalaarnissaa neriuutigaara. Kalaallit Nunaanit pisartunit allaanerusumik misigisaqarnissara neriuutigaara, atuakkiortoq inuusuttoq Maasi Brøns Chemnitz oqarpoq.
Kalaallit Nunaanni atuakkanik saqqummersitsisarnerup nutaarpalaarnerulernissaanut 'Norden 2040' peqataasinnaassasoq neriuutigaa.
Workshoppernerup saniatigut peqataasut katillugit 26-iusut imminnut avitseqatigiissapput. Reykjavikimi Internationale Litteraturfestivalertoqarnerani tamanna pissaaq.
Inuusuttut siunissaq pillugu allataat Medium.com-imi saqqummersinneqarumaarput.
Inuusuttut avasissumiittut qanoq eqqarsartariaaseqarnersut paasiniarlugu taamatut aaqqissuisoqarpoq.
Kalaaleq atuakkiortoq Niviaq Korneliussen angalaqataassaaq.
Nunatsinnit peqataassapput:
Karoline Lennert Sørensen
- Kenny Fisker
- Maasi Brøns Chemnitz
- Debora Erna Michala Hansen Kleist
- Ilannguaq Apollo Karlsen
- Ludvikka Tellesen
- Marco Lund Olsen
- Sandra Mathiasen