Allatta 2040: Ajugaasut qulit nassaarineqarput

Inuiaqatigiit 2040-mi qanoq inissisimassappat? Tamanna atuakkiortussatut piukkunnaateqartut qulit oqaluttualiornermik unammisitsinermi, Napamit, Milik Publishingimit, Nunatta Atuagaateqarfianit aamma Sorlammit aaqqissuunneqartumut peqataasunit eqqoriarneqarpoq.

- Oqaluttualiat 32-t nunatsinni inuusuttut 15-iniit 25-nut ukiullit nassiussaasa nalilersorneranni malunnarsimavoq arlallit siunissaq taartutut aammali isumalluarfittut takorlooraat, ilaatigut aatsitassarsiornermik, pissaaneqarniunnermik, asanninnermik, pisuutut piitsutullu inooriaatsinik assigiinngeqisunik, nappaatinillu ulorianartunik atugassaqartitsiffiusoq.

Nunani Avannarlerni Piorsarsimassutsikkut Attaveqaat taama nalunaaruteqarpoq.

Allatta 2040-mi ajugaasut tulliaaqqissaarneqaratik aajuku:

Karoline Lennert Sørensen
Bibi Lars Lund olsen
Kenny Fisker
Ilannguaq Karlsen
Maasi Chemnitz
Ludvikka Tellesen
Nukappi Boassen Wille
Debora Hansen Kleist
Marco Lund Olsen
Sandra Mathiasen

Ajugaasut qulit Nuummi januaarip naanerani naapisinneqassapput, Jessie Kleemann Mette Moestrupilu pikkorissarfigissallugit. Nuummiinnerminni allatatik ataatsimut atuakkiassatut saqqummerseriaannanngorlugit suliareqqissavaat. Naammassippata atuagaq ”Allatta – 2040” saqqummersinneqarumaarpoq.

Inuusuttut atuakkiortoqatitik Reykjavikimi naapissinnaavaat
Taamatullu aamma ajugaasut tamarmik immikkut 2500 koruuninik akissarsitinneqassapput, soorluttaaq inuusuttut atuakkiortut Reykjavikimi 2015-ip ingerlanerani naapinnissarsuannut peqataasinnaassasut.

- Oqaluttualiat alutornartuliaapput nutaamillu eqqarsarluni allataallutik. Inuusuttut siunissaq ullumikkornit allaanerusoq taarnerusorlu takorloorpaat, soorlu aatsitassarsiornerup kingunipilorisinnaasai, pissaaneqarniunnerit ilungersunartut, sorsunnersuit allat aamma aningaasaatilissuit pissaanermik atornerluineri allaaserisanut ilaallutik, naliliisut naliliipput.

Imalu nangillutik:

- Soqutiginarluinnarpoq oqaluttualiat arlallit kalaallit ilinniarluarsimasunngorsimanermikkut pisoorsuartut inuulersimanerannik imaqarmata. Illuatungaani piniartuuneq pitsuulluinnarluni inuunermik kinguneqalersimammat aalisarneq piniarnerlu sunngiffimmi taamaallaat aallunneqalersimasoq allaaserineqarpoq. Nunarsuarmi kulturi tunulliullugu atugartuutut inuuneq salliutinneqalersimasoq allanngortinniarlugu, inuiaat nukittuut pilersinneqassappata ilaqutariittut inuuneq, ikioqatigiinneq, susassareqatigiinneq aamma siulinik ataqqinnilluni anersaarsiorneq, pisariaqalersimasutut aamma taakkartorneqarput.

Oqaluttualianik naliliisuupput atuakkiortoq Jessie Kleemann, Ilimmarfimmi ilinniartitsisoq Birgit Kleist Pedersen, atuakkiortoq Hans Anthon Lynge aamma Allattami ajugaaqataanikoq aamma Kalaallit Atuakkiortut siulersuini ilaasortaq Sørine Steenholdt.

Atuagaq 2015-mi saqqummissaaq
Atuakkiaq inuusuttut ukioq 2040-p qanoq innissaanik takorluuinerannik – allaaserisanik titartakkanillu imaqartussaq - juuni 2015-imi saqqummissangatinneqarpoq.

Atuagaq saqqummeruni e-bogitut aamma KNR suleqatigalugu atuffassissutitut saqqummersinneqarumaarpoq, soorluttaaq oqaluttualiat ilaat ataaseq marlulluunniit Nunatta Isiginnaartitsisarfia suleqatigalugu isiginnaagassiarineqarumaartut.