Kalaallit Nunaat
Allannguutissatut siunnersuut landsdommerip isumaqatiginngilaa
Suliat isumagineqartarneranni eqqartuussisaanermi inasisip allanngortinneqarnissaanik inatsisinik atortitsinermut ministerip siunnersuutaa Søren Søndergårdip isumaqatiginngilaa - allannguutissatulli siunnersuut naalakkersuisunut ilaasortap inassuteqaatigaa
Nunatsinni eqqartuussiveqarnermi pisortap Søren Søndergaard-ip Inatsiseqarnermut ministeriap allannguititsiniarnera isumaqatiginngilaa. Tamatumani pineqarluni inuit akornanni saqittaattarnerit sinerissami eqqartuussivinni suliarineqartarunnaarlugit Nunatta Eqqartuussiviani suliarineqartalernissaanut siunnersuutigineqarsimammat.
Tamatumunnga tunngatillugu Naalakkersuisuni ilaasortap Martha Lund Olsen-ip Nunatsinni Eqqartuussisarnermi siunnersuisoqatigiit siulittaasuannik Per Walsøe-mik ataatsimeqqatiginnissimavoq. Tamatumani Naalakkersuisuni ilaasortap Martha Lund Olsen-ip aammalu Per Walsøe-p inatsiseqarnermut ministeriaqarfiup innersuussutigisaa, Nunatsinni Eqqartuussisarnermi siunnersuisoqatigiit inassuteqaataannit tunuliaqutalik isumaqatigalugu matumuuna oqariartuuteqarput.
Taamatut paasissutissiivoq Tusagassiivik.
– Toqqissisimanarnavianngilaq innuttaasut nunatsinni eqqartuussivinni suliarinnittarnernut tunngatillugu assigiimmik pineqartassanngippata. Taamatummi pisoqariaannaassinnaassammat sinerissami eqqartuussisut kisiat sulianik tamakkuninnga aalajangiisinneqartalissagaluarpata. Tassami massakkutuut suliassat siullermeerneqarneranni sinerissami eqqartuussiviit suliassat pineqartut suliarisarmatigit, imaluunniit nunatsinni eqqartuussiviup suliassat siullermeerneqarneranni suliarisassappatigit, ilaqutariinnut inatsisinillu atortitsinermut naalakkersuisoq Martha Lund Olsen oqarpoq.
Itisiliillunilu:
– Taamatummi aaqqiisoqassagaluarpat innuttaasut sullinneqarneranni assigiinngitsunik aalajangiisoqartarsinnaanissaa ilimanaateqarsinnaassaaq. Imatut paasillugu, sinerissami eqqartuussiviit ataasiakkaat assigiinngisitaartumik isummerfigisassagunikkit, tassami pissusiviusut aamma imaammata sinerissami eqqartuussivinni suliassat inatsisilerituutut sullissivinnit illersuisulerlutik suliffeqarfiit assigiinngitsut suliaqartitsisarmata. Pissutsillu tamakku ilimanaatigisin-naavaat, ilumut innuttaasut assigiiaartumik pineqartarnerat innarlerneqarsinnaasassasoq.