Toqusoq
Allan Idd Jensen toquvoq
Siornatigut inatsisartuni, Nuummi kommunalbestyrelsemi aalisariutaatilillu Allan Idd Jensen sivikitsumik napparsimareerluni toquvoq
Nunatsinni assagiarsunniarnermi uiluinniarnermilu aallarnissaasut ilaat Allan Idd Jensen akornatsinniikkunnaarpoq. Ilaqutaasa nalunaarutigaat sivikitsuinnarmik napparsimareerluni ataasinngornermi Næstvedip napparsimmaviani toqusoq.
Allan Idd Jensen 1956-mi Nunatsinnut tikippoq taamanilu umiartortunngorluni. Imaanilu inuussutissarsiorneq ukiorpassuarni sulinerani qitiuvoq uiluinniarneq aamma assagiarsunniarneq aallarnisarneqarmata inerisaanermi suleqataalluni.
Qallunaani siullersaalluni inatsisartuni ilaasortaasimavoq Nuummilu kommunalbestyrelsemi Atassut sinnerlugu ilaasortaasimalluni.
Ataasinngornermi junip 24-at Næstvedip napparsimmaviani sivikitsumik napparsimareerluni 75-nik ukioqarluni toquvoq Næstved gl. Kapel-imiillu marlunngornermi ilineqassalluni.