qimaasut
Allamiut Canadaliarniartut allat
Qimaasut inuusuttut marluk sapaatip-akunnerata siuliani Nuummit Canadaliariaraluarput kilisaammut isertortumik ilaallutik. Politiit oqaatigiumanngilaat qanoq ilillutikKalaallit Nunaannut tikissimanersut. Taamatut iluatsitseriaraluartuni taakkua siulliunngillat
Uissuummissutigineqangaatsiarpoq sapaatip-akunnerani kingullermi Polar Seafoodip tamanut saqqummiummagu ingerlatsivissuup kilisaataata ilaani inuusuttunik isertorlutik ilaasunik marlunnik nassaarsimallutik.
Inuusuttut taakkua marluk, oqarsimasut Canadaliarniarlutik qimaasutut akuerineqarumallutik, kilisaammut Acadienne Gale II-mut, Canadamiut erfalasuannik erfalasulerluni angalasumut, ulloq unnuarlu paarsisoqaraluartumut ikisimapput.
Kilisaat Canadap avannamut kangiani aalisarsimavoq Nuummilu raajanik suliffissuarni suliassanik taaneqartartunik, usingiareerluni Tunup avannaanut aalisariaqqittussaasimalluni.
Atuaruk: Tusagassiorfik: Qimaasut inuusuttut marluk kilisaammi nassaarineqartut
Angalaneq takisooq
– Kilisaat aatsaat sapaatip-akunneri 2-3 qaangiuppata Canadaliartussaasimavoq, taamaattumik angalaneq taakkununnga sivisussagaluarpoq – avannamut ingerlapput kujammukaratik, Polar Seafoodimi siulersuisut siulittaasuat Henrik Leth oqarpoq.
17-inik ukiullit – aappaa Syriamilu aappaalu Algierimiu – umiarsuup torsuusaani nassaarineqarsimapput, kilisaatip Nuummit aallarneranit ullut aappaata affaa qaangiuttoq. Kinaassutsiminnik uppernarsaateqanngillat, passeqaratik aningaasaateqaratillu. Avannaarsuanili pissutsinut piareersarsimagunarput.
Canadaliarniat
– Ajunngillat, peqqippasipput silamullu nillertumut naammattumik oqortunik atisaqarlutik, Henrik Leth oqarpoq, umiarsuullu naalagaa aalajangerpoq Nuummut uterniarluni, tassanilu qimaasut marluk politiinut tunniunneqarput.
Polar Seafood aatsaat siullermeersumik umiarsuarmini isertortumik ilaasunik nassaaraluartoq, nunanit allamiunik Kalaallit Nunaat aqqusaarlugu Canadaliariaraluartunik naammattuuisoqarnera ilimagineqarsinnaasutut taama qaqutigoortinginngilaq.
Angallammik attartorniartut
Nuummi Arctic Boat Charterimik piginnittoq arlaleriarluni saaffigineqartarsimavoq Canadamut ikaakkusuppatsik akilerumallugu.
– Ukiuni kingullerni marlussunni arlalinnik e-mailikkut Facebookimilu quppernitsigut saaffigineqartarsimavugut inunnit nunarsuarmi sumiiffinni assigiinngitsuneersunit, angallatinnik Canadaliarniarlutik attartorniartunik. Suna siunertarineraat eqqoriaanerinnaviuvoq, allaanngilarli tassaasut inuit anngiortumik Canadamut iserniartut, Erik Palo Jacobsen oqarpoq, taassumalu tamatigut inussiarnersumik akisarsimavai inassutigalugu aqqutit pisortatigoornerusut atoqqullugit.
Allaaserisaq tamaat AG-mi uani sapaatip-akunnerani saqqummertumi atuaruk. Aviisi uani aamma pisiarinissaanut periarfissaavoq: