Allakkerivik
Allakkanik nassiussineq akisunerulertoq
Ulloq 18. januar 2016-miit atuutilersumik Tele-Postip allakkat nalinginnaasut nassiunnerinut akit allanngortissavai
Allakkanik nassiussineq ukioq manna akisunerulissaaq, Tele-Post ilisimatitsivoq.
Allakkat A-t 20 gram ataallugu oqimaassusillit nunatta iluani nassiunneqartut assersuutigalugu 11,00 koruuniniit 12,00 koruuninut qaffassapput. Allakkat taakku Europaliartussat 12,50 koruuniniit 13,50 koruuninut qaffassapput.
Allakkat ikinnerusut
- Siornatigumut naleqqiullugu allakkat nassiuttakkagut ikinneerarsuupput, taamaattumik aningaasartuutitta matussuserniarnerat ajornakusoorpoq. Qaangiissutaasinnaasoq tassaavoq allakkat nassiunnerinut akimik allannguilaarneq, allakkanut poortukkanullu pisortaq Nino Fencker, tusagassiuutinut nalunaarummi nassuiaavoq.
Appariaat
Allakkat tammatsaalisat akii malunnartumik 95,00 koruuniniit 60,00 koruuninut apparpoq, allakkanullu nalilinnut tapiissutaasartoq 108,00 koruuniniit 99 koruuninut appartinneqarluni.
Poortukkat tunngaviusumik akii ukiut aappassaa allanngunngilaq, timmisartukkulli nassiussanut kilomut tapiutaasartoq 43,00 koruuniniit 45,00 koruuninut qaffappoq.
Aamma atuaruk: Filateliap frimærkit 24-t saqqummiutissavai