aalisarnermut inatsit
Oqaaseqaatip assortuussutigineqarnerani ilisimasallip Kruse taperserpaa
Kammeradvokatip aalisarnermut inatsisissaq sioqqullugu isumaliutissiissusiaa, Aalisarnermut Piniarnermut Naalakkersuisup Karl Kristian Krusep tamanut takutinnginnissaanut pisinnaatitaaffeqarpoq.
Pisortat ingerlatsinerannut inatsimmut ilisimasalik arlaannaanulluunniit attuumassuteqanngitsoq, Oluf Jørgensen, Danmarks Medie- og Journalisthøjskolemi ilisimatusarnermut pisortaq emeritus taama naqissusiivoq.
Piumasaqaat atorunnaartoq
Sulisitsisut marloriariarlutik isumaliutissiissut assortuussutaasoq piumanikuugaluarpaat, tassani pisassiissutit killiligaanngitsut atorunnaarsinneqarnerinut atatillugu taarsigassiiffiginninnissamut periarfissat inatsitigut nalilersorneqarpoq. Aviisi AG aamma allagaatinik takunnikkumalluni qinnuiginninnikuuvoq, kisianni misiliinerit tamarmik aalisarnermut naalakkersuisoqarfimmit atortinneqanngillat.
Karl Kristian Krusep itigartitsinerit marlunngornermi Sermitsiaq.AG-mut ima tunngavilersuuteqarfigai:
- Kammeradvokatip ilisimasalittut nassuiaatigisai allanut oqaatigeqqusaanngitsutut suliaasarput taamatullu pisortat ingerlatsineranni inatsimmi paragraf 10, imm. 4-mut atatillugu suliat nalunaarsorneqarannut allagaatitut takunnissinnaanermit atuutsinneqaratik, pisortat suliamillu ilisimasallit akorngini allaqatigiinnerit eqqartuussivigitsigut imaluunniit eqqartuussisorisunut suliakkiuteqarumanermik nalunaaruteqarsimanermut atortinneqarsinnaaneri aallaaveqartillugit.
Aamma atuaruk: Kruse: Isumaliutissiissut isertugaavoq
Danskit pisortat ingerlatsinerannut inatsisaat Krusep innersuussutigisaanut assingusumik pisinnaatitsiffeqartoq, Oluf Jørgensen naqissusiivoq.
Piginnaatitaaffik atorneqarsinnaasoq
- Suliaq qanimut periarfissaappat, taava taanna piginnaatitaaffik atorneqarsinnaavoq, Oluf Jørgensen, Sermitsiaq.AG-mut ilisimatitsivoq.
- Taanna Kammeradvokatip inatsisitigut inatsisip atorsinnaaneranut imaluunniit taarsigassiinermut akisussaaffimmik naliliineranut atorneqarajuttarpoq. Inatsisissatut siunnersuut assersuutaasinnaavoq, ilisimatusarnermut pisortaq ilisimatitsivoq.
''Folketingip Ombudsmandiata taamatut piginnaatitaaffeqarnerup atorneqarsinnaanera akuerisimagaa'', Oluf Jørgensen ilisimatitsivoq.
Itigartitsineq naleqquppoq
- Kammeradvokatimit nalunaarusiaq allagaatinik takunnikkumanermi itigartitsissutigineqarnera naleqquttuusoq taamaammat nalilerpara, Oluf Jørgensen oqarpoq.
Aviisi AG saqqummertumi kingullermi allagaatinik takunnikkumanermut itigartitsineq pillugu ombudsmandimut maalaarutiginnittoqarsimanera ilisimatitsissutigineqarpoq. Sermitsiaq.AG-p Oluf Jørgensenip nalilersuineri aaqqissuisumut akisussaasumut Christian Schultz-Lorentzen AG-meersumut takutippai.
Aaqqissuisuuneq peqqissiminngilaq
Kruse eqqortumik iliorsimarpasimmat aviisip ombudsmandimut maalaaruteqarnera peqqissimissutigaajuk?
- Naamerluinnaq, Christian Schultz-Lorentzen oqarpoq, nassuiaallunilu:
- Allagaatinik takunnikkumanermut akerleriissuteqarneq ukiaq tamaat pivoq, Sulisitsisunit siulersuiffiulluni. Aalisarnermut inatsit kalaallinut inuiaqatigiinnut annertuumik kinguneqartitsisinnaavoq. Tamanna eqqarsaatigalugu - ombudsmandi aqqutigalugu - ilisimasallit uani suliami eqqortuliornersut naqissusertissallugu pingaaruteqarpoq. Suna eqqortuunersoq eqqortuunnginnersorlu aviisip qulaajassallugu suliassaraa. Ombudsmandip aalajangiineraqanoq inerneqassanersoq apeqqutaatinnagu paasinissaa qilanaaraarput, Christian Schultz-Lorentzen oqarpoq, taanna akisussaasutut aaqqissuisuunermi saniatigut tusagassiorfimmi Sermitsiaq.AG-mi pisortaavoq.
Aamma atuaruk: AG Ombudsmandimut maalaartoq