aatsitassat

Allaffissornerujussuaq ajornartorsiutaasoq

Isumaqatiginninniutivinnik aallartitsiniassagatta aatsitassanut naalakkersuisoqarfimmit akissutit suli utaqqivavut. Allaffissornerujussuup Kalaallit Nunaanni piorsaanerit ineriartortitsinerillu akornusersorpaat, aatsitassarsioqatigiiffimmi Tanbreezimi pisortaq oqarpoq. Isornartorsiuineq naalakkersuisoqarfimmit eqqunngitsuunerarneqarpoq

Tanbreezimi pisortap Greg Barnesip Kujataani Killavaat Alannguanni aatsitassanik qaqutigoortunik piiaanissaq pillugu qinnuteqaatimik iluarsaassap aatsitassanut naalakkersuisoqarfimmit akissuteqarfigineqarnissaa utaqqikatalluinnarpaa. Sermitsiaq Aviisi taama allaaserinnippoq.

2015-mi itigartitsineq

Tanbreez 2015-imi septembarimi aatsitassarsiorfimmit piiaanissamik qinnuteqaataa itigartinneqarpoq, tamatumani aatsitassarsioqatigiiffimmit piffissami kingusinnerusumi aatsitassanik qaqutigoortunik piiakkatik pingasoriaatinngorumaartut allassimanerat tunngavilersuutigalugu. Tamatuma kingorna ingerlatseqatigiiffimmit qinnuteqaammik nutaamik nassiussisoqarpoq aamma 2016-imi decembarimi aatsitassanut naalakkersuisoq Muté B. Egede aamma Tanbreezimi pisortaq Greg Barnes ataatsimiipput, tassanilu naalakkersuisup ilaatigut suliniummi siuariartornerup qulakkeerneqarnissaa Naalakkersuisunut aalajangiisuusoq oqarpoq, tassami tamanna najukkami suliffinnik piorsaanermillu pilersitsissammat.

Misilittagaqanngillat

Tamatumali kingorna suliassami pisoqaqqissimanngilaq, tamanna Greg Barnesip uggoraa.

– Namminersorlutik Oqartussat utaqqiusaarpavut. Maannakkut pisoqalerneranik ilisimatinneqartuaannarpugut. Susoqarnerli ajorpoq. Nalunaarut kingulleq tassaavoq 2017-imi kvartalit aappaanni akuersissut pissarsiarisinnaagipput, kisianni tamanna piviusunngorniarparsinngilaq. Uagummi kisitta utaqqinngilagut. Ingerlatseqatigiiffinni Kalaallit Nunaanni suliniutinik aallartitsiniartuni tamani oqaluttuaq taanna assigiippoq. Allaffissortut arriippallaamik sulipput. Namminersorlutik Oqartussanut ukiut tamaasa atortussiornernut uppernarsaatinillu nutarterisarnernut australiamiut dollarii 2-3 millioner (10 mio. koruunit missaat) atortarpavut. Tamanna politikerit pisuussutiginngilaat, kisianni aatsitassanut naalakkersuisoqarfimmi aatsitassarsiorfinnik misilittagaqartoqanngilaq, Greg Barnes, oqarpoq.

Piumasaqaatit naammassinngilaat

Aatsitassanut naalakkersuisoqarfimmi pisortaq Jørgen T. Hammeken-Holmip suliap sivisusinnaanera paasilluarsinnaavaa. Kisianni oqartussaasut arriisaarpallaarnerannik taamaallaat pissuteqanngitsoq kisiannili qinnuteqaateqartup Tanbreezip piumasaqaatit Namminersorlutik Oqartussat suliniutinut taamatut ittunut piumasaqaatigisartagaat naammassisimannginnerannik aamma pissuteqarpoq.

Allaaserisaq Sermitsiaq aviisimi kingullermi saqqummertumi tamakkerlugu atuaruk:

Powered by Labrador CMS