Alianartoq: Chaufføri gummigedimit toqunneqartoq
61-inik ukiulik pingasunngormat Sisimiut ikuallaaviani gummigedimit aporneqarluni aqqunartitersimanini Sisimiut napparsimaviani toqqutigaa
Ippassaq pingasunngornermi Sisimiut ikuallaaviani chaufføri 61-inik ukiulik gummigedimit aporneqarnera Sisimiuni politiit alianarluinnartutut isigaat.
Teknikkikkut misissuinerit
- Chaufførip containerit eqqaavimmut apuussimavaa. Aquttarfimmiit anillassimavoq lastbiilillu tunuaniit containeri peernissaa suliarilersimallugu. Ajoraluartumik gummigedi uteriartorsimavoq, Karl Jørgen Lennert Sisimiuni politiivini politikommissæri Sermitsiaq.AG-mut paasissutissiivoq.
Politiit teknikkikkut misissueqqissaarnerit ingerlatileruttorpaat, pisorli sullivimmi ajutoornertut isigineqarnera pissutigalugu Sullivinnik Nakkutilliisoqarfik aamma akulerutsinneqarsimavoq.
Upalungaarsimasuutitat piareersimatinneqartut
- Alianaqaaq. Angut erngertumik napparsimaviliaanneqarpoq nalunaaquttallu akunnerata affaata qaangiunnerani toqusimasutut nalunaarutigineqarpoq, politikommissæri oqarpoq.
Qanigisaasut suleqataalu ikiorneqarnissaat pillugu upalungaarsimasuutitat piareersimatinneqartut, taassuma paasissutissiaraa.