ajunaarneq
Alianaqisumik ajunaarneq inuit pingasut inuunerannik naleqartoq nukappiaqqap annaffigaa
Ilulissat avannaatungaani umiatsiaaraq alianaqisumik ajutoormat, angutit marluk arnallu ataatsip inuuneranik naleqarpoq, nukappiararlu kisiartaalluni annappoq.
Politiit tallimanngormat nalunaaqutaq 13.02 nukappiaqqap VHF-kkut ikiortissarsiorluni kalerrisaarisimasoq tusagassiuutinut nalunaarummi paasissutissiaraat.
Aquuteralannik ajutoorneq
Umiatsiaaraq iluliaminermut aporsimasoq aquuteralaallu aallarumajunnaarsimasut, nukappiaqqap oqaluttuaraa.
Apornermi umiatsiaaqqami ilaasut allat pingasut imaanut nakkarsimasut, nukappiaqqap nassuiaatigaa, taanna ujaasinerup kingorna nalunaaqutaq 16.22 toraarneqarsimavoq.
Angutit marluk arnarlu ataaseq ajunaartuupput.
Toqungasut toraarneqartut
Unnuup ingerlanerani ajutoorfiup qanitaani angutip aappaa arnarlu toqungasut sakkutuut imarsiortut helikopteriannit Lynximit toraarneqarput, taakkuali umiarsuamut alapernaarsuummut Ejnar Mikkelsenimut ujaasinermi peqataasumut timaat qaqinneqarput.
Ujaarineqartoq kingulleq unnuap qeqqata missaa tikillugu ujaarineqarsimangaluarpoq ajoraluartumilli toraarneqarani, politiit immikkoortortaqarfimmi aqutsisuat, John Davidsen paasissutissiivoq, angutillu ajunaarsimanissaa ilimagineqarpoq. Ujaarisitisineq ullumi taamaatinneqarpoq.
Qanigisaat kalerinneqareersimapput
Ajunaartut qanigisaat kalerinneqareersimasut, immikkoortortaqarfimmi aqutsisup paasissutissiaraa.