Aleqa: Sermitsiaq.AG Vittumut ajutumeereriarpoq

- Nunat tamangajammik nammineerlutik qanoq timmisartunut silaannartakkoornermut akitsuusiinissartik aalajangersartarpaat. Tamanna pituttugaanngitsumik, Aleqa Hammondip tamanna oqaatigaa.

Sapaammi nal. 13:20 Nunatta qulaani timmisartut. Kalaallit Nunaata nammineerluni silaannakkut qulaattut akiliutaannik aalajangersaasinnaavoq, Aleqa Hammond taama isumaqarpoq. Tamanna timmisartortitsinermik suliaqartup ''Harry Potterimisut eqqarsarnertut'' oqaatigaa.

Sermitsiaq.AG ‘’nunatsinni naalakkersuinermik sulialimmik, nunatta namminiilivinnissaanik sulissutiginnikkumasumik ajutumeereriaqqiineratut iluatsinngitsutut nalilerpara’’. Folketingimut ilaasortaq aamma Inatsisartunut qinigassanngortittoq, Aleqa Hammond, Amerikap kitaata sineriaanit Seattlemit, ataatsimiinnermut peqataaffigisaminit tusagassiuutinut nalunaarummi allappoq.

Ulluni kingullerni Vittus Qujaukitsup Nunatta silaannaatigut timmisartut aqqusaartut akitsuusersuiffiginerisigut, Kangerlussuarmi aamma Narsarsuarmi mittarfiit ingerlateqqinnissaannut neriorsuuteqarnera pillugu allaaserinnereernitta kingorna, Aleqa Hammondip Sermitsiaq.AG isornartorsiorpaa.

Tatiginninngilluinnarneq

- Sermitsiaq.AG-p - danskit naalakkersuisuinit akissutigineqartut kisiisa tunngavigalugit – ‘ilumuunngitsumik timmisartunit qulaaqquttunit millionilikkaanik isaatitsiniarneraaneq’ akikinaarineruallaarpoq. Suliap qiterivaa tusagassiorfiit danskit naalakkersuisuinit oqaatigineqartunik sattaaserlutik upperinninnerat, tamanna Kalaallit Nunaanni oqaatigineqartunik aallaavittut tatiginninngilluinnarlutik, Aleqa Hammond allappoq, kinaassutsimillu ersersitsiniarluni.

Qallunaat naalagaaffianit pigineqartumi Naviairimi attaveqatigiinnermut pisortaq, Bo Pedersen, ingerlatseqatigiiffik koruunimik ataasinnguamilluunniit kalaallit silaannaatigut timmisartut qulaattarnerannit iluanaaruteqarneq ajortoq, Sermitsiaq.AG-mut ilisimatitsivoq.

- Aningaasartuutigut matussusertarpagut, allamik naamik. Silaannakkut 19.000 fod ataallugu silaannakkut angallannermik aqutsinermut naalagaaffik ukiumut 20 millionit koruuninik akiliisarpoq, Bo Pedersen oqarpoq.

Naalakkersuisut: Iluanaaruteqartoqanngilaq

Nunatta silaannaatigut timmisartut aqqusaartut akitsuusersorneqarnerini Aleqa Hammondip oqarnerata akerlianik danskit naalakkersuisui aamma Naalakkersuisut isumaqarput. Aviisip Sermitsiap tallimanngormat tikkuarpaa, IA-meersoq Peter Olsen, qaammatit marluk matuma siorna tamanna pillugu naalakkersuisumit Erik Jensenimit akissuteqarfigineqareersimasoq:

- Kalaallit N unaata timm isartunit 19.500 fod-it sinnerlugit qutsitsigisukkut qulaanneqartarneranut (en-route) akitsuuteqartitsisoqarpoq. Akitsuutip ilusilerneqarnerani isertitat aningaasartuutillu piffissap ingerlanerani imminnut naapertuupput, taamaattumillu ukiut arlallit ingerlanerini timmisartumik qulaassisarnermut akitsuutiniit ilanngaaseriikkanik iluanaaruteqartoqarneq ajorpoq, Erik Jensen ilisimatitsivoq.

Atuaruk: Vittu ilumuunngilaq: Timmisartunit qulaaqquttunit isaatitsiniarnera ilumuunngitsoq

Iluanaaruterpassuit

Nunat arlallit timmisartunik nakkutiginninnikkut iluanaarujussuartarpunngooq: ‘’Assersuutigalugu Canada timmisartut silaannartakkoortut akitsuutitut akiliisillugit 1,3 milliard dollarinik isertitaqartarpoq, Rusland Siberiap silaannartaatigoortunit 500 million dollarinik isertitaqartartoq’’, Aleqa Hammond allappoq.

Oqariartuut uppernarsaatissartaqanngilaq, kisianni danskit timmisartortitsinermik suliaqartumik tusarfiup oqaatigaa, Hammondip isertitat iluanaarutinut paarlaakkunarai.

- Nav Canada 4.800-nik sulisoqarpoq, teknikkikkullu aningaasaliissuterpassuaqarluni. Taakku angusaat aningaasanit taakkartugaasa ilamininnguariinnarpai. Ruslandimut tunngatillugu aamma kisitsisit taamatut kaaviiaartitanut tunngarpasipput.

Silaannarmit nammineq tigoriaannaat

Kalaallit Nunaata timmisartunik nakkutiginninneq angerlaallugu silaannakkut qulaaqqunnermit iluanaarutit nunap karsianukartinneqassasut, Aleqa Hammondip oqariartuutigaa.

- Googlekkut ”airspace and overflight fees” misissulaarlugu paasinarsivoq nunat tamangajammik nammineerlutik qanoq timmisartunut silaannartakkoornermut akitsuusiinissartik aalajangersartaraat. Tamanna pituttugaanngitsumik, taanna allappoq.

Timmisartornermik suliaqartunit Sermitsiap paasisaqarfia, siunissami aningaasat qilammit nakkaanissaannik piviusuunngitsumik isumaqartoqarnissaanut aarlerisaarivoq:

- Silaannakkut angallannermik aqutsineq nunarsuarmi tamani aningaasartuutit malillugit ingerlanneqarpoq. Aningaasartuutit tunuliaqutigalugit ICAO peqatigalugit isumaqatiginninniarnerit kingorna alaajangersarneqartarput. Nuna pissaanilissuaq immaqa kimigiisilaarsinnaavoq, kisianni Kalaallit Nunaat? Tamanna Harry Potterimisut eqqarsarneruvoq!.

Powered by Labrador CMS