Aleqap atornerluinera
Aleqap tunuarnissaanik piumasaqartut amerliartorput
Inuit Ataqatigiit Nuummi immikkoortortaqarfiata kiisalu partiip inuusuttaasa Naalakkersuisut siulittaasuata tunuarnissaa piumasaqaatigaat
Naalakkersuisut siulittaasuat Aleqa Hammond Siumumeersoq aatsaat taama tatisimaneqartigaaq.
Isornartorsiuisut amerliartorput.
Nuummi Inuit Ataqatigiit Aleqa Hammondip tunuarnissaa piumasaqaatigaat.
- Aleqa Hammond Naalakkersuisut siulittaasuattut aquummik tigusilaaginnarluni nunatta karsianiik atornerluisarsimaneranut inatsisartunut ilaasortanut tamanut kaammattuutigerusupparput tamarmik tatiginnikkunnaarnermik taaseqataaqqullugit. Taaseqataaneq akisussaaffimmik tigusineruvoq qinikkatut aamma parteeqatigigaluaraanni, immikkoortortaqarfimmi siulittaasoq Terkild Huusum-Isaksen tusagassiutinut nalunaarummi oqarpoq.
Kuupik Kleistip Inuit Ataqatigiinneersup Inatsisartunit tunuarnera pissusissamisoortuusoq Inuusuttut Ataqatigiinnit oqaaseqarput.
- Kuupik Kleistip tunuarnermini iliuuserisimanani inatsisinut naapertuutinngimmata kinguneqartippaa, taamaasilluni qinikkanut suli tatiginnissinnaaneq aqqutissiuullugu. Inatsinimmi unioqqutitsineq inatsisaattuliorneruvoq kusassarneqarsinnaanngitsoq, Inuusuttut Ataqatigiinni siulittaasoq Múte Bourup Egede aamma siulittaasup tullia Jane Petersen allapput.
- Aleqa Hammond-ip inatsisaattuliorsimanini nunattalu karsia neqitsiullugu minibarimik allanillu aningaasanik atuisimanerminik naapertuiilluartunngorsaaniarnera akuerisinnaannglluinnarparput. Ilumut Aleqa Hammond-ip Naalakkersuisutut atorfimminut ingerlatsinerminut akisussaanini aamma Inatsisattuni Naalakkersuisunilu ilaasortat aningaasarsiaqartitaanerat il. il. pillugit Inatsisartut inatsisaat unioqqutissimavaa?, Inuusuttut Ataqatigiinnit allapput.
Siumumeersup Aleqa Hammondip Naalakkersuisunit Inatsisartuniillu sulinngiffeqarnissamik qinnuteqarpoq aningaasanik atuisimanera pillugu kukkunersiuisut qulaajaaneranni. Kukkunersiuinermut Ataatsimiititaliap isumaliutissiissutaa suli naammassineqanngilaq. Taanna Naalakkersuisut siulittaasuat ammaalluni oqalugiareerpat saqqummiunneqassaaq.
Kukkunersiuinermut Ataatsimiititaliamit nalunaarutigineqartareerpoq Aleqa Hammond nunatta karsianit 106.363,27 koruuninik namminerminut ilaquttaminullu atuisimasoq. Taakku maajip 28-anit 2013-mit maajip 21-anut 2014-mut aningaasat atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.