Aleqap tatigineqarnera annikilliartorpoq

Naalakkersuisut siulittaasuanut Aleqa Hammondimut tapersersuisut Inatsisartunut 2013-mi qinersisoqareersorlu tatigineqarnera annikilliartuinnavippoq.

Nunatta karsiani aningaasanik imminermut atuisoqarnerata aamma Aleqa Hammondimut illersuisut ikilissagunarput.

Københavns Universitetimit Nunat avannarliit pillugit ilisimasalik Lars Hovbakke Sørensen oqarpoq.

- Inuiaqatigiinnik pingaartitsisuulluni qinersisoqareernerani oqarpoq, siuliminiillu ileqqorinneraluni oqarluni. Aleqa Hammondili pillugu paasinninneq taamaniliilli allanngoriartorpoq. Siuliminit allaanerussuseqanngitsoq maannakkut isigineqarneruvoq.

- Aatsitassarsiornermut kiisalu Danmarkimit namminiilivinniarnermut politikkini suli iluatsippallaanngilaa. Naalakkersuisutut siulittaasuunera politikkikkut aamma inuttut iluatitsinerusimanngitsoq inuppassuit isumaqarput, Lars Hovbakke Sørensen oqarpoq.

Aleqa Hammond nunatta karsianit 106.363,27 koruuninik atuisimasoq tallimanngormat tusarliunneqarpoq.

Akileeqqusisoqartaraluartoq apriilimi 2013-mili aatsaat aningaasartuutit septembarip arfineq pingajuani ukioq manna akilerneqarput.

Tamanna Siumup Atassutillu Naakkersuisooqatigiinnermik isumaqatiginninniarnerminni sunniuteqassangatinneqarpoq.

- Pisoq Siumumut qularnanngitsumik sunniuteqangaatsiassaaq. Partii assigiinngitsunit tatisimaneqarpoq. Taamaattumik Atassutip anguniakkani ajornannginnerusumik angusinnaassagai isumaqarpunga, Lars Hovbakke Sørensen oqarpoq.

Aleqa Hammondimut tatiginninnginnermik taasititsisoqarnissaa Inuit Ataqagiinnit oqaatigineqareerpoq.

Sermitsiaq.AG-p pisortaanerata Poul Krarupip Inatsisartut marlunngorpa ataatsimiinnera aallartippat susoqassanersoq suli oqaatigiuminaatsuusoq oqarpoq.

- Susoqarpiassanersoq suli oqaatigiuminaappoq. Amerlanerussuteqartut isumaqarpata qinersisoqariaannaavoq. Apeqqutaavorli Aleqa Hammond Naalakkersiusooqatini inississimassanerai, Poul Krarup oqarpoq.