Aleqap inatsisitigut ataataqanngitsut suli sukataaruppai

Naak inatsisitigut ataataqanngitsut pillugit suliami angusaqartoqarpallaanngikkaluartoq, Naalakkersuisut siulittaasuata suli sukataaruppai.

- Neriulluarnera pigiinnarpara sulilu neriuutigalugu inatsisitigut ataataqanngitsut taarsiivigineqarnissaat pillugu oqaloqatigiinneq aqqutissiuunneqarumaartoq, Nuummut tallimanngornermi angerlannginnermini oqarpoq.

- Inatsisilerineq eqqarsaatigalugu pisariusariaqanngikkaluarpoq. Thulemi sulisartuusimasut Uummannamiillu pinngitsaalisaallutik nuutsitaanikut Danmarkimiit aningaasatigut siornatigut taarsiivigineqarnikuupput.

Statsministerilu isumaqatigiinngitsut
Statsministeri Helle Thorning-Schmidt, Socialdemokraterne, taarsigassiisoqarnissaa apriilip qulingiluaani inatsisitigut ataataqanngitsut taarsigassinneqarnissaannut apeqqummut isumaqataanani nalunaarpoq.

Tamannali Naalakkersuisut siulittaasuanit isumaqatigineqanngilaq:

- Ataatsimeeqateqarsimanerpassuakka oqalliseqateqarsimanerpassuakkalu inatsisitigut ataataqanngitsut ajornartorsiutaannut aaqqiissutissamik pilersitsisimanngillat. Kisianni Folketingip Nunarput pillugu ataatsimiititaliaat ataatsimeqatigereerikkalu taakku nalunaarput inatsisissatut siunnersuutissiap aappassaaneerneqarnissaanut isumaliutissiissutigineqarnissaa kinguartinneqassasoq, tassami ataatsimiititaliap statsministeri itisiliivigeqqulersaarmagu sooq uanga ujartuinera naapertorlugu statsministeri naalakkersuisullu inatsisitigut ataataqanngitsut pillugit oqaloqateqarumannginnersoq.

- øbenhavnimi ataatsimeeqateqarninni tamani inatsisitigut ataataqanngitsut pillugit kalaallit isumaat saqqummiuttarpakka. Taakkununnga ilaatillugu kalaallit nuannaarutigigaat inatsisissatut siunnersuutip akuerineqarnera periarfissiissammat inatsisitigut ataataqalernissaq, ataataasullu aqqa atulersinnaalernissaa kingornussarsiffiginissaalu, ataataasoq suli uumassappat.

Aleqa Hammond apriilip 25-anit maajip aappaata tungaanut Københavnimiissaaq.