Folketingi

Aleqap aningaasanut inatsit pillugu Hjort ataatsimeeqatigigaa

Kalaallit Nunaanni sanaartugassanut angisuunut qallunaat aningaasaliinissaat attaviitsup neriuutigaa

Kalaallit folketingimut ilaasortat nutaatut finansministerimut aningaasanut inatsisissaq pillugu qaaqquneqarput, Aleqa Hammond sismanngornermi oqaloqatiginnippoq

Kalaallit Nunaannit Folketingimut ilaasortaq attaviitsoq, Aleqa Hammond, sisamanngornermi finansministerimik Claus Hjort Frederiksenimik (V) ataatsimeeqateqarpoq, tassani ministerip aappaagumut aningaasanut inatsisissaq oqaloqatigiissutiginiarlugu partiinik qaaqqusivoq.

Aleqa Hammondillu aningaasanut inatsisissap marlunngormat oqallisigineqarneranut atatillugu isummersuutini, tassani itisilernissaanut periarfissinneqarpoq.

Atuaruk: Attaviitsutut oqalugiaqqaarneq: Aleqa kommunefogedit amerlanerunissaannik ujartuivoq

Aningaasaliinerit
Attaviitsup oqaluuserisaasa ilagaat, qallunaat Kalaallit Nunaanni sanaartornernut angisuunut aningaasaliinissaannut kissaateqarneq, soorlu umiarsualiviit mittarfiillu.

- Nuannaarutigaara aningaasaqarnermut naalakkersuisoq oqaatsinnut isumaqataanera. Aningaasaliinerup suliffissuit pilersinnissaanut illuatungeriit iluaqutiginluagassaraat.

- Nikeriartoqarnera nuannersutut taavara ukioq mannamiillu Væksfondenip aningaasaliinissanut ammaassinera nuannaarutigalugu. Alloriarneruvoq pingaarutilik annertusagassarlu. Aningaasaliineq isumatusaartutut isigineqassaaq ukiorpassuarnilu siunissami illuatungeriit iluaqutissaqarfigissavaat allaat Nunarput naalagaaffinngoreeraluarpat, Aleqa Hammond tusagassiuutinut nalunaarummi erseqqissaavoq.

SU pillugu
Kalaallit ilinniartut ilinniagaqarnermusiaat aamma oqallisigineqarnissaanut piffissaqarpoq, tassani naalakkersuisut 2025-mut pilersaarummi Statens Uddannelsestøttemi annertuunik allannguuteqartoqarnissaanik siunniussaqarput.

- Danmarkimi ilinniartuunersiuteqartarneq pillugu 2025-mut pilersaarummi Kalaallit Danmarkimi ilinniartuutitsinnut sunniutigisassai aarlerinartut ilanngullugit itisilerpakka. Naalakkersuisut kaammattorpakka nunatsinni naalakkersuisunut saaffiginnissuteqassasut ilinniartuunersiuteqartarnerup allannguutissaasa kingunerisinnaasai paaseqatigiissuteqarfigeqqullugit. Aaqqiinerit naammaginartut naammaginartumik suliarineqarlutik ingerlanneqartariaqarmata, taanna erseqqissaavoq.

Aningaasaqarnermut naalakkersuisup Aleqa Hammond oktoberimi isumaqatiginninniarnerup ingerlaqqinnerani aggersaqqippaa, politikeri taama ilisimatitsivoq.

Atuaruk: IA qallunaat aningaasanut inatsisaannut piumasaqaatinik piariigaqartut

Powered by Labrador CMS