fiskeri

Aleqap Ane Naajalu akissuteqarfigai

Naalakkersuisut siulittaasuata Aleqa Hammondip, Siumut, eqqunnginnerarpaa aalisartut tunitsivimmik namminneq ammaasinnaanangitsut

IA tunuliaqutaralugu Inatsisartunut ilaasortat marluk Ane Hansen aamma Naaja Nathanielsen aalisarneq pillugu juulli sioqqullugu Naalakkersuisunut pingaarnerusutut apeqqumminnut qulingiluanut ataanilu apeqqutinut arlalinnut akissuteqarfigineqarput.
Apeqqutit pingaartumik Aleqa Hammondip ammaanersiorluni oqalugiarneranit nungusaataanngitsumik aalisarnermik aallaaveqarput, aammattarli aalisarnermut inatsisip, ukiakkut ataatsimiinnissamut kinguartinneqaqqammersup, ingerlanneqarnissaanik.
Inatsisartunut ilaasortat taakkua marluk apeqqumminnut tunngavilersuutigaat aalisarnermut politikkimik sangujoraartumik ingerlatsisoqarnera.
Naalakkersuisut siulittaasuata Aleqa Hammondip, Siumut, pingaarnerusumik paasissutissiissutigaa siunissami aalisagartassiissutissat aamma ilisimatuussutsimik tunngaveqassasut biologit inassuteqarnerannik, aammattaarli aalisartut misilittagaannik ilisimasaannillu.
– Siusinnerusukkut pisarsimasunit allanngortitsisoqangaanngilaq, taamaallaalli inatsisitigut tunngaviliisoqarluni. Ilisimatuussutsikkut siunnersuinerit pisarnertut suliarineqartassapput ilutigalugu aalisartut ilisimasaat tamakkiisumik siunnersuusiornissani ilusilersorlugit ilanngullugit suliarineqartalissallutik, Aleqa Hammond allappoq.
Nangilluni akivoq aalisarnermut inatsimmut allannguutissatut siunnersuutikkut qulakkeerneqartoq aalisarnermik inuussutissarsiorneq selskbinit ikittunit angisuunit kisimi pigineqassanngitsoq:
– Inatsisissatut siunnersuummi nassuiaatit innersuussutigineqarput, tassani sinerissamut qanittumi aalisarnermi aalisarsinnaatitaanerit tulaassuivigineqarsinnaatitaanerillu inunnut ingerlatseqatigiiffinnulluunniit ikittuinnarnut eqiterneqarsimanerat tunngavigineqarpoq. Taamaattumik siunnersuutit tassunga atatillugu isigineqassapput. Naluneqanngilarmi allaat raajartassat ilarparujussui ingerlatseqatigiiffinnit ikittuinnannguanit pigineqaleriartuinnarmata. Naalakkersuisut isumaqarput siunnersuutigineqartutut allanngortitsinikkut taamatut eqiterutsitsisimaneq siunissaq isigalugu siammaanermik kinguneqarsinnaassasoq.
Tamatuma saniatigut Ane Hansenip Naaja Nathanielsenillu tusarusuppaat aalisartutut tunisassiorfimmilu sulisutut inissisimanerit qanoq ittuunersut.
– Naalakkersuisut tunngavilersuutigivaat inuussutissarsiuummi tassani kina sumi inissisi-manersoq ersarissumik takuneqarsinnaalissammat. Aaqqissuussineq piusoq qanoq ililluni kia sumi inissisimaneranik erseqqarluttumik takusaqarfiugami? Aalajangernerup tamatuma aamma kingunerissanerpaa ingerlatsisut ullumikkut tunisassiorfimmik pisassiissutinillu ataatsikkut piginnittuusut tunisassiorfiutitik tuninngikkunikkit akuersissutinik arsaarneqartalernissaat? Tassunga atatillugu atorunnaarsitsinermut ikaarsaariarfeqartoqassava, taamaassappallu tamanna qanoq sivisussuseqassava? Tamanna suliaqarfiup tungaatigut nalikilliliisarnermut maleruagassianut atuuttunut naapertuutissava? Tunisassiorfimmik/akuersissutinik tunisisoqartoqassagaluarpat massakkut piginnittuusut taarsiiffigineqassappat?, illua'tungiilluttut aperipput.
Aamma atuaruk: IA: Aalisarnermut politikki sangujoraartoq
Naalakkersuisut siunertaraat aalisarnermik inuussutissarsiuteqarnermi ammasumik sunniuteqarluartumillu unammilleqatigiinnissaq qularnaarniarlugu killiliussanik pitsaanerpaanik pilersitsinissaq. Tamatumalu anguniarneqarnerani aalisarnermik ingerlatsisut nunamilu tunitsiviit immikkoortinneqarnissaat siunnersuutigineqarpoq.
Aaqqissuussineq massakkut atuuttoq ima ineriartorsimavoq ullumikkut pissutsit imaalersimallutik nunatsinni aalisarnermi ingerlatseqatigiiffiit aalisarnerup iluani niuernermi an-nertuumik aalajangiisuusumillu inissisimalersimallutik, ingerlatseqatigiiffiit taakku nunami tunitsivinnik piginnittuunermik saniatigut aalisarsinnaatitaanernik annertuunik pigisaqarnerat tunngavigalugu. Pissutsillu taamaannerat imatut kinguneqarsinnaammat ingerlatseqatigiiffiit taakku ilaat aalisarnermi akigitinneqartunut aalajangiisunngorsinnaallutik, aalisarnermi immikkoortut taakku avissaartinneqarnissaat Naalakkersuisut siunnersuutigaat. Taamatut aaqqissuussisimanerup piffissalerlugu atorunnaarsikkiartornissaa soorunalimi suliarineqassaaq inuussutissarsiuteqartullu peqatigalugit atorunnaarsitsiartuaar-nissat isumaqatigiissusiorfigineqassapput, Naalakkersuisullu arajutsisimanngilaat sulias-sami tassani allanngortitsisoqartariaqarnera. Allanngortitsinissanut periusissat tamakku maleruagassallu allat inuussutissarsiuteqartut suleqatigalugit nalilersorneqassapput, Aleqa Hammond akivoq.
Aleqa Hammondip ilanngullugu nassuiarpaa aalisartut, aningaasarsiaasa 50 procentii sinnerlugit aalisarnermeersuutut inuussutissarsiutigalugu aalisartutut taaneqartut. ilanngullugu eqqunnginnerarpaa aalisartut tunitsivinnut naammaginngisaminnut pisaminnik pinngitsaalisamik tunisisariaqartut. Ane Hansen Naaja Nathanielsenilu toqqaannartumik aperipput:
– Naalakkersuisut uppernarsarsinnaavaat aalisarnermut inatsit nutaaq ilutigalugu sinerissami qanittumi aalisartut tunitsiviit akiillu naammaginngikkunikkit nammineq pigalugu tunisassiorfittaarnissaminnut mattussaalissasut?
Aleqa Hammond tunuartitsivoq ima akilluni:
– Naamik, siunnersuutikkut siunissami inuit aalisariutinik ingerlataqartut peqatigitillugu ilalerlutik tulaassuiveqarnermik ingerlataqarsinnaajunnaarnissaat siunnersuummi pineqanngilaq.
Akissutit tamaasa allaaserisap talerpia'tungaani downlolade-rsinnaavatit

Powered by Labrador CMS