Aleqap atornerluinera
Aleqamut tatiginninnginnermik taasisoqassappat immikkut akuersissuteqartoqaqqaassaaq
Naalakkersuisut siulittaasuannut tatiginninnginnermik Inatsisartuni taasisoqassappat sapaatit akunnerini tulliuttuni, Inatsisartoqarfimmit assigiinngitsunik akuersissuteqartoqaqqaassaaq
Inuit Ataqatigiit siulittaasuata Sara Olsvigip oqaatigaa Naalakkersuisut siulittaasuannut Aleqa Hammondimut tatiginnginnermik taasititsiniarluni arfininngormat. Amerlanerussuteqartut taasinermi Aleqa Hammondimut tatiginnginnermik naasissagaluarpata Aleqa Hammond Naalakkersuisut siulittaasoriunnaassavaat.
Inatsisartut ukiaanerani ataatsimiinnerat aqagu marlunngornermi ammarneqassaaq nalunaaqutaq 11.00. Aleqa Hammondimut tatiginnginnermik taasititsisoqarsinnaanera pisinnaanngilaq. Ammaanersiornermi Naalakkersuisut siulittaasuat Aleqa Hammond kisimi oqalugiartussaavoq. Aamma Inatsisartuni tatiginnginnermik taasititsinissat nalunaarutigineqartussaapput sapaatit akunneri tallimat sioqqullugit.
- Inatsit inatsisaavoq, Inatsisartoqarfimmiilli akuersissummik pisoqarneratigut tatiginninnginnermik taasititsisoqarsinnaavoq. Tamannali siornatigut takuneqarnikuunngilaq, Nils Baum Sermitsiaq.AG-mut oqarpoq.
Inatsisartut Allattoqarfianni tusagassiuutinut aaqqissuinermullu suleqataavoq.
Oqaluuserisassamut tullermut ingerlaqqittoqarnissaanik siunnersuut tunngavilersuummigut Naalakkersuisunik imaluunniit Naalakkersuisunut ilaasortamik tatiginninnginnermik tunngaveqartinneqarpat siunnersuut taamaattoq aatsaat oqaluuserineqartumut pissusissamisoortumik attuumassuteqaruni oqaluuserineqarsinnaavoq, Inatsisartut suleriaaserisaanni atuarneqarsinnaavoq.
- Oqaluuserisassat, Inatsisartut oqaluuserisassaattut ilanngutitikkumasat, kingusinnerpaamik Inatsisartut ataatsimiinnissaata pineqartup aallartinnissaa sapaatip akunnerinik tallimanik sioqqullugu piumasaqaatit naapertorlugit saqqummiunneqassapput, Inatsisartulluunniit Siulittaasuannut tunniunneqarlutik. § 41, immikkorluinnaq ittunik pisoqartillugu piffissaliussat Inatsisartut Suleriaasianni matumani aalajangersakkat Inatsisartut Siulittaasoqarfiannit sanioqqunneqarsinnaapput, Inatsisartut Allattoqarfiat ilisimatitsivoq. Inatsisartuni pingasunngorpat ataatsimiittoqassanngilaq, ataatsimiinnissat sisamanngorpamut nuutsinneqareermata siusinnerusukkut. Inatsisartuni ataatsimiittoqassaaq sisamanngorpat tallimanngopallu.
Oqallisissatut nutaamik saqqummiussisoqanngippat aningaasanut inatsip 2013-meersup oqaluuserineqalernerani oktobarip 23-ani tatiginnginnermik siunnersuummik taasititsisoqarsinnaavoq.
Partii Naleqqami siulittaasup Hans Enoksenip Aleqa Hammondip nunatta karsianit 106.363,27 koruuninik atornerluisimanera suliassatut annertuutut isigaa. Taamaattumik Aleqa Hammondimut tatiginnginnerminik taasiniarluni Sermitsiaq.AGmut oqaatigaa.