Aleqap atornerluinera
Aleqamut siunnersuisuusimasoq annertuumik isornartorsiuisoq
Julie Rademacherip Inatsisartuni 2013-mut qinersinissami Siumup Naalakkersuinikkut aqutsisunngornissaa sulissutigaa. Naalakkersuisut siulittaasuannut maannakkut annertuumik isornartorsiuivoq
Naalakkersuisut siulittaasuannut Aleqa Hammondimut siunnersortaasimasoq Julie Rademacher, suleqatigisimasaminut Aleqa Hammondimut annertuumik isornartorsiuivoq.
- Kalaallit Nunaanni innuttaasut 10 procentii Inatsisartunut 2013-mi qinersinermi Aleqa Hammondimut qinersipput. Siumup qineqqusaarutaat piviusunngortinneqarnissaanut sulinissamut periarfissatsialammik tunineqaraluarpoq. Qinersisoqareersorli qatigattuusatut ililluni nunap iluanut toqqorpoq mattullunilu. Tusarnaarnissamut, suleqateqarnissamut suleqatigiititsinissamullu qineqqusaarutini eqquutsinngilai, Julie Rademacher Facebookimi quppernermini allappoq.
Aleqa Hammond ukiup affaa Naalakkersuisut siulittaasuattut atorfeqareersoq Julie Rademacherip suleqateqarnini septembarimi 2013-mi unitsippaa.
Tatigineqarunnaartoq
- Aleqa Hammond tapersersorneqarunnaarpoq. Kisianni pingaarnersaasoq unaavoq, aamma tatigineqarunnaarpoq. 'Nuna ataasiusoq – Inuiaat ataatsimoortut' pillugit qineqqusaartoqarpoq, maannakkulli angusimasaa tassaavoq inuiaqatigiinnik avissaartuutitsineq. Qineqqusaarutigineqartoq eqqarsaataannanngorpoq piviusunngunngisaannartoq. Suliniuteqartoqanngilaq, inatsisiliortoqanngilaq ataatsimuulersitsisumik, Julie Rademacher allappoq.
Julie Rademacherip Kalaallit Nunaanni politikkikkut inissisimanera ajuusaarutigaa, pisooqataasutullu aamma misigaaq. Taamaattumik Siumut Aleqa Hammond siulittaasutut uppisinneqarnisssaa kiisalu qinersititsinissamut suaaruteqartoqarnissaa kaammattuutigaa.
Qinersisoqartariaqartoq
- Siumumi ilaasortanut kaammattuutigisinnaavara Aleqa Hammondip partiimi siulittaasuujunnaarnissanik suaaruteqarnissaa kiisalu Inatsisartunut qinersisoqartoqarnissaa aamma suaarutigineqassasoq kaammattuutigaara. Aleqa Hammondimut qinersisut amerlapput, tamanna kinguneqartinneqartariaqarpoq. Partii tatigineqalissappat qinersinissamik suaaruteqartariaqarpoq aamma Siumumi anguniagarineqartut allanngortinneqartariaqarput, Julie Rademacher allappoq.