københavn
Aleqa 'Den Sorte Diamant'-imi naapiguk
Aaqqissuisut piumasaqaataat angusinnaagukkit Københavnimiillutillu sisamanngorpat, taava Naalakkersuisut siulittaasuat naapissinnaassavat
Naalakkersuisut siulittaasuat Aleqa Hammond, Siumut, Københavnimi Sorte Diamantimi aaqqissuussinermi sisamanngorpat septembarip 18-ani naapinneqarsinnaassaaq. Aaqqissuussinermili peqataarusukkaanni piumasaqaatigineqartut anguneqaqqaassapput.
Aleqa Hammond tusagassiortumit Martin Breumimit Dronningesalemi Det Kongelige Bibliotekimiittumi nalunaaqutaq 15.00-imit 17.00-imut apersorneqassaaq.
Apersuineq Det Kongelige Bibliotekip Det Udenrigspolitiske Selskabillu suleqatigiinnerisigut aaqqissuunneqarsimavoq.
Qaaqqusissummi Det Udenrigspolitiske Selskab ilaatigut ima allappoq:
- Kalaallit Nunaanni Naalakkersuisut siulittaasuat Aleqa Hammond eqqartortillugu isummat maluginiagassaapput. Politikeritut Aleqa Hammond qamani nukimmik peqarpoq, imminut nunaminullu tunngatillugu Danmarkimit avissaarnissaq takorluugaraa. Nunasiaataasimanerulli qaangerniarneraniipput Kalaallit Nunaanni inuuniarnikkut ajornartorsiutit, ilinniarsimassutsip appasinnera nunallu Aleqa Hammondip nunap avissaarfiginiagaanit ukiumoortumik tapiissutit 3,6 milliard koruuniusut annertuumik pinngitsoorsinnaannginnerat.
Den Sorte Diamantimi aaqqissuussineq Dronningesalimi pissaaq, taannalu aaqqissuussineruvoq matoqqasoq, Danmarkimi Udenrigspolitiske Selskabimi ilaasortanut ilinniartunullu Det Kongelige Bibliotekip 'Students Only!'-mi peqataasunut qaaqqusanullu immikkut ittunut naatsorsuussaallunii.
New Yorkiliassaaq
Naalakkersuisut siulittaasuat aaqqissuussinermut qulaani taaneqartumut atatillugu ataatsimiinnissallu pissutigalugit Københavnimiissaaq septembarip 17-anit 19-at tikillugu.
Aleqa Hammond New Yorkiliarluni aallassaaq arfinignngorpat, tassani Naalagaaffiit Peqatigiit Nunap Inoqqaavi pillugit 'nuna tamakkerlugu najukkanilu nunap inoqqaavisa pisinnaatitaaffiisa atuutilersinneqarnerat' pillugu Nunarsuarmioqatigiit ataatsimeersuarneranni saqqummiussissaaq septembarip 22-ani. Naalagaaffiit Peqatigiit Allattaanerannit Ban Ki-moonimit qaaqquneqarluni silap pissusaa pillugu ataatsimeersuarnermi ilisimatuussuseq silallu pissusaata allanngornera pillugit saqqummiussissalluni septembarip 23-ani.
Naalakkersuisut Siulittaasuata Nunatta Washington D.C.-mi Sinniisoqarfittaarput nutaaq pisortatigoortumik ammassavaa septembarip 24-ani.