Qinersisoqassava?
Aleqa qinersinissamik suaaruteqassanngilaq: Inuiaqatiinnut ikiuivunga
Naalakkersuisut siulittaasuata Aleqa Hammondip illuatungiliuttut qinersisoqarnissaanik kaammattuuteqarnerat eqqissisimasumik tiguaa
- Illuatungiliuttut isumaqatigippassuk isumaqatiginngippassulluunniit tusaatissatut tiguinnagassaavoq, Nunatsinnili atukkat siornamut naleqqiullugit ullumikkut pitsaanerulersinneqarnissaanut sulinissatsinnut innuttaasunit piginnaatinneqarpugut.
Naalakkersuisut siulittaasuat Aleqa Hammondip illuatungiliuttut qinersisoqarnissaannik kaammattuuteqarnerat pillugu KNR-imut oqarpoq.
Inuit Ataqatigiit, Partii Naleraq, Demokraatit Partii Inuit siulittaasui ataatsimut Naalakkersuisut siulittaasuannut Aleqa Hammondimut Siumumeersumut qinersisoqarnissaanik kaammattuuteqarput.
Illuatungiliuttut tusagassiutinut nalunaarutaanni ilaatigut oqaatigineqarpoq, Naalakkersuisooqatigiit malunnartumik ataatsimuunngitsut.
- Naalakkersuisooqatigiit tunuliaqutaqanngillat. Pisariaqarluinnalerpoq eqqortumik aki-sussaassuseqartumillu nunatta aqunneqarnissaa. Inatsisartut immikkut ataatsimiigiaqquneqarnissaat qinnutigisariaqarparput, Naalakkersuisullu Siulittaasuat qinersinis-samik nalunaaruteqartariaqarpoq akisussaaffini naapertorlugit nunatta iluamik patajaatsumillu aqunneqarnissaa timitalerumallugu, Inuit Ataqatigiit siulittaasuat Sara Olsvig, Partii Naleqqap siulittaasua Hans Enoksen, Demokraatit siulittaasuat Anda Uldum kiisalu Partii Inuit siulittaasuat Nikku Olsen allapput.
Sermitsiaq.AG-mit Naalakkersuisut siulittaasuat pisoq pillugu oqaaseqartitsiniaraluarput iluatsiffiunngitsumik.