assit takukkit
Aleqa: Pisuussutivut ersigissanngilagut
Piareersarluarsimasoq Aleqa Hammond Narsami innuttaasut apeqqutaat akeqattaarpai
Naalakkersuisut siulittaasuat Aleqa Hammond, Siumut, Narsami innuttaasunik katersortarfimmi ataatsimiigiaqqusigami apeqqutit imaaginnavipput.
Innutaasunik ataatsimiititsinermi assigiinngitsorpassuit eqqartorneqarput. Innarluutillit, Kalaallit Nunaata aningaasaqarnera illoqarfimmilu atortussiat sananeqartartut ilaatigut eqqartorneqarlutik. Soorunami aamma aatsitassarsiorneq sammineqarpoq, tassani Kuannersuit sammineqangaatsiarluni.
- Nunatta pisuussutaat atorluarneqartariaqarput, ersiginagit. Naalakkersuisunut uanga siulittaasuuvunga, Nunattalu aningaasaqarnera pitsaasumik ingerlanneqarnissaa akisussaaffigaara. Uanga aamma Inatsisartuni ilaasortaasut innuttaasunit taaneqarluta sulivugut. Aalajangigassat pingaaruteqartut isummerfigisariaqarpavut, Nunatsinnullu aningaasanik isaatitsissutaasinnaasut aamma isummerfigisariaqarlugit, Aleqa Hammond oqarpoq. Aatsitassarsiorfimmik ammaasoqassappat inatsisit toqqammavigalugit aatsaat ammaasoqassasoq oqaatigaa.
Unammilligassat
Naalakkersuisut 2013-imit suut angusimaneraat ilaatigut Aleqa Hammondip eqqartorpai. Kalaallit Nunaalli aamma unammilligassaqartoq oqaatigaa.
Suliffissaaleqineq ilaqutariinnut eqquisarpoq, tamannalu kommunini annertuumik aamma socialitigut suliakkersuutaasarluni. Atuarfitsialaap aamma ineriartortinneqaqqinnissaa eqqartorpaa, tassani atuartut atuanngitsoortartut iliuuseqarfigineqarnissaat pingaartillugu.
Inuiaqatigiinni åinaveersaartitsinissaq naalakkersuisooqatigiinni pingaartutut isigineqartoq Aleqa Hammondip ilaatigut aamma eqqartorpaa.
- Pujortartartut pillugit annertuumik inuiaqatigiinni ingerlalluartumik suliarineqarpoq ukiuni arlaqartuni, assinganik imigassamut pinaveersaartitsineq ingerlanneqalissaaq, oqarpoq.
Misileraalluni qaleralinniarnerit avaleraasartoorniarnerillu aamma Naalakkersuisut siulittaasuata eqqartorpai, taakkulu aamma Kalaallit Nunaata aningaasaqarneranut isaatitseqataasinnaasutut isigai.
Kalaallit Nunaata EU-mi aallartitaqarfia eqqartorpaa, kiisalu suleqatigiinnissamik isumaqatigiissut aalisarnikkut ilinniartitaanikkullu iluaqutaasussaq aamma eqqartorlugit.
Assit ataani takukkit