nytårstale
Aleqa nunasiaasimaneq pillugu: Saammaateqatigiinneq tullinnguuppoq
Naalakkersuisut siulittaasuata ukiortaami oqalugiaataani saammaateqatigiinneq nunasiaasimanerlu imaqartorujussuupput. Aleqa Hammond arlalinnik kajumissaaruteqarpoq
Naalakkersuisut siulittaasuattut ukiortaami oqalugiaqqaarnermini Aleqa Hammondip, Siumut, saammaateqatigiinnissaq Danmarkimillu nunasiaasimaneq pingaartittorujussuuvai.
– Isumaga naapertorlugu oqaluttuarisaanitta kiisalu inuiaqatigiinni innuttaaqatigiit imminnut pissuseqaqatigiinnerisa akornanni pissutsit ullumikkut paqumigineqarnerpaanut ilaapput, taanna ilaatigut oqarpoq.
Paasineqarnissaa pissutigalugu aaqqissuisoqar4fiup ´saammaasseqatigiinneq´ pillugu Naalakkersuisut siulittaasuata oqaasii maani issuassavai:
´Nunarput Danmarkimit nunasiaatigineqarsimavoq. Piffissalli ingerlanerani nunarput imminut aqulerluni ineriartorpoq. Nunatut inuiattullu ineriartornitsinni Danmarkip nunattalu akornanni inatsisilerinermut aningaasaqarnikkullu attaveqaatit annertuumik aallutarisimavavut.
Asserpassuit takukkit: "2013-imi politikkimi torrallatat"
Saammaateqatigiinnissamik Isumalioqatigiissutaq pilersinneqarpoq
Sorpassuit ineriartortissimavavut, suulli tamaasa ineriartortissimanngilavut; pisinnaatitaaffinnut aningaasaqarnikkullu pissutsit annertuumik ineriartortissimavavut. Maanna ima siusarsimatigilersimavugut, allaat uagut inuiaat kalaallit nunat tamalaat akornanni inuiattut nammineq oqartussaassuseqarnermik pisinnaatitaaffilittut ullumikkut akuerineqarsimalluta. Akuerineqarneq pisinnaataaffillu taanna inuiaat kalaallit FN-ip ataani nunat tamalaat inatsisaat naapertorlugu maanna pigaat.
Inuiaqatigiittulli inuttullu ineriartornitsinni pereersut oqallisiginissaat sumiginnarsimavarput. Pisimasut, nunasiaasimanerup aaqqissuussaanera kiisalu pissutsit, ilaatigut innuttaaqatigiiaat akornanni nunatsinni ullumikkut ulloq manna tikillugu suli atuuttut oqallisiginissaat sumiginnarsimavarput. Pissutsit oqallinnerillu taakku aalajangersimasumik aaqqissuussaasunillu sinaakkuserlugit oqallisigalugit aallartinnissaat pisariaqartipparput. Taamattaarlu oqallinnernit taamaattunit kaammattuutit pilersut kinguneri iliuuseqarfigisariaqarpavut. Taamaammat ukioq manna Saammaateqatigiinnissamik Isumalioqatigiissitamik pilersitsisoqarnissaa Naalakkersuisut sulissutigaat.
Paquminartut angisuut
Isumaga naapertorlugu oqaluttuarisaanitta kiisalu inuiaqatigiinni innuttaaqatigiit imminnut pissuseqaqatigiinnerisa akornanni pissutsit ullumikkut paqumigineqarnerpaanut ilaapput. Paquminartut tamakku sapiissuseqarluta oqallisigalugit pissutsit qanoq issusaat akuerisariaqarpavut, ataqatigiissutsillu akuerineri patajaallisarlugit. Pissutsillu naapertuutinngitsut saqqummertassappata, pissutsinik allannguisinnaanermut piareersimasariaqarpugut. Pissutsit taamaattut innuttaasut amerlasuut misigissutsimikkut attorneqaatigisarpaat. Misigissutsillu tamakku saqqummerlugit suliarisariaqarpavut. Taamaammallu saammaateqatigiinneq alloriarneruvoq tulliuttoq pissusissamisoortorlu.
Qanga pisuni kiisalu innuttaaqatigiiaat akornanni uagullumi nammineq akunnitsinni pisimasut saammaattariaqarpavut. Uagut nammineq nunatsinni immitsinnut pingaarnertut inissittariaqarpugut, inuiattullu alloriarnernik tullernik alloriartariaqarluta. Taamaalillutami innuttaasut amerlanerit inuunerminnik namminneerlutik aqutsilissapput, inuiaqatigiinnullu iluaqutaasumik iliuuseqarsinnaanngorlutik.
Saammaateqatigiinnermik suliaq annertuujuvoq
Saammaateqatigiinnermik suliaqarneq, suliaavoq annertooq. Taamatut suliaqarneq arlaannannilluunniit mattussiniarnertut ingerlanneqassanngilaq. Suliarli taamaattoq, pissutsinik nuanniissinnaasunik saqqummiisoq ajornakusoorsinnaavoq. Taamatullu pisoqartillugu taamaaliornerput oqaluttuarisaanitsinni pisimasunik kiisalu akunnitsinni pisimasunik suliarinninniarnerusoq eqqaamassallugu pingaarpoq, taamaaliornitsigummi nukittunerulissagatta.
Suliap aallartinnissaa naammassinissaalu qilanaareqaara. Alloriaqqilluta saammaateqatigiinnermik suliaqarneq kingumut qiviarlugu, taamatut suliaqarneq nunatta innuttaasalu oqaluttuarisaaneranni allanngorfiusutut qiviarsinnaanngussavarput.
Nunarput nunaavoq immikkuullarissoq; kalaallillu inuiaapput immikkuullarilluinnartut. Allat maani nunassinniarlutik aalajangersimasut peqatigalugit maani inuuvugut; peqatigiillutalu inuuvugut suliassanik avataanit isigalugu naammassineqarsinnaanngitsutut isikkoqartunik suliaqarsinnaassuseqartut. Tamakkulumi naammassisarpavut, Aleeqa Hammond oqarpoq.
Sammisat allat
Aleqa Hammondip ukiortaami oqalugiaammini aamma eqqaavai ´ukioq allanngorfiusoq´, nunami kommunit aaqqissuuteqqinneqarnerat, peqqissuseq, nunalerineq nunanullu tamalaanut attuumassuteqarpoq.
Naalakkersuisut siulittaasuata ukiortaami oqalugiaata qallunaatut kalaallisullu atu8aruk pdf-filini allaaserisap talerpia' tungaani.
Oqalugiaataa qanoq isumaqarfiaajuk?