danmarkimi naalakkersuisunngortut
Aleqa Løkkemi periarfissanik takusaqarsinnaasoq
Siumut sinnerlugu Folketingiut ilaasortap Kalaallit Nunaata naalakkersuisuusarsimasunik Venstremeersunik suleqateqarluartarsimanera maluginiarpaa
- Naalakkersuisut partiimik ataasiinnarmik tunngaveqartillugit tamanna politikkikkut siamasissumik suleqatigiinnerunissamik pisussaaffiliisarpoq. Sapinngisamik annerpaamik tapersersorneqarnissaq anguniarneqartariaqarpoq, taamaalillutillu ilaasortat Atlantikup avannaaneersut sunniuteqarnissamut periarfissaqarnerulerlutik. Tamanna soorunami pitsaasuuvoq.
Taama Siumut sinnerlugu Folketingimut ilaasortanngortoq Aleqa Hammond Lars Løkke Rasmussen naalakkersuisunik ikinnerussuteqartunik Venstremeersunik 18-inik ministeritalinnik ullumi ilisarititsereersorlu naliliivoq.
- Danmarkimi Venstre naalakkersuisuutitaqaraangat suleqatigiinnerup pitsaasuusarneranik misilittagaqarpugut. Aamma Siumut naalakkersuisuutitaqaraangat. Oqaluttuarisaaneq taama ittoq tunngavigalugu pitsaasumik suleqatigiittoqarnissaa ilimagaara, Aleqa Hammond, Kristian Jensenip nunanut allanut ministerinngortinneqarneranik immikkut maluginiagaqartoq, oqarpoq.
- Tamanna tupaallannalaarpoq. Ministeriuffik taanna Kalaallit Nunaannut pingaaruteqarpoq, nunanut allanut sillimaniarnermullu politikki oqartussaaffigilersimannginnatsigu. Kristian Jensen qujanartumik Kalaallit Nunaannik ilisimaarinnippoq. Akileraartarnermut ministeriunermini arlaleriarluni tikeraarpaatigut. Taamaattumik nunanut allanut politikkimi tunngavissat ataatsimoorussat pineqartillugit taassumani pitsaasumik inuttaqalernerput ilimagaara, Aleqa Hammond, Lars Løkke Rasmussenimut aamma pitsaaqutinik taasassaqartoq, oqarpoq.
- Qanittukkut ataatsimeeqatigiinnitsinni erseqqissaatigaa oqartussaaffiit Danmarkimit Kalaallit Nunaat sinnerlugu isumagisarineqartut pingaarnersiuinermi qaffasinnerusumik inissisimatinneqassasut, tunniunneqartartut pisariaqartinneqartullu oqimaaqatigiilluarnerusinnaaqqullugit, Aleqa Hammond oqarpoq.