New York
Aleqa: Kunngeqarfik Danmarki maligassiuisuuvoq
Silaannaap allanngornera tulluussarnerlu pillugit nalilersuinermi nunap inoqqaavi ilisimasaat aamma tusaaniarneqartassasut Aleqa Naalakkersuisut siulittaasuat ilaatigut aamma oqarpoq
Aleqa Hammond aamma ataasinngornermi Nunarsuarmioqatigiit Ataatsimeersuarnerisa saniatigut Unescop aaqqissugaanik 'Silaannaap allanngornera tulluussarnerlu pillugit nalilersuinermi inuit ilisimasaasa ilaatinneqarnissaat' pillugu pingaarnertut oqalugiartuuvoq.
Tassani Aleqa Hammondip nunani tamalaani Issittumilu ilisimatuussutsikkut naliliinerit najukkami aammalu ilisimasatoqqani atorneqarnissaasa pingaaruteqarnerat qitiutillugu sammivai, Namminersorlutik Oqartussat tusagassiutinut nalunaaruteqarpoq.
Danmarkip Kalaallit Nunaatalu aamma qanimut suleqatigiilluarnerat takussutaasoq nunanit allanit ataqqineqartoq, Aleqa Hammond ilisimatitsivoq.
- Kunngeqarfik Danmarki nunap inoqqaavinit nunarsuarmit tamaneersunit suliassaqarfiup tamatuma tungaatigut maligassiuisutut akuerisaavoq, Danmarkilu aamma 2007-imi Nunap Inoqqaavisa Pisinnaatitaaffii pillugit Nalunaarutip akuerineqarneranut atatillugu pingaarutilimmik iliuuseqarpoq, Aleqa Hammond oqarpoq.
- Danskit nunanut allanut ministeriata anersaaq taanna anersaaralugu Kunngeqarfiup Danmarkip Nunap Inoqqaavisa Pisinnaatitaaffii pillugit Nunarsuarmioqatigiit Ataatsimeersuarnerannut peqataanissamut qanimut suleqatigaluta piareersarsimanera nuannaarutigaara, Aleqa Hammondip danskit nunanut allanut ministeriat Martin Lidegaard oqalugiarnermi nersualaarpaa.
Isumaqatigiissut
Ataatsimeersuarnerup iliuuseqarnissaq pillugu inaarutaasumik isumaqatigiissummik, nunap inoqqaavisa pisinnaatitaaffiisa atuutsinneqarnerisa nukittorsarneqarnissaat anguniarlugu, tunngavigineqartussamik akuersissuteqarnermik kinguneqarnissaa naatsorsuutigineqarpoq.
Nunap Inoqqaavi pillugit Nunarsuarmioqatigiit Ataatsimeersuarnerat pillugu inaarutaasumik isumaqatigiissut Danmarkip Nunattalu peqataaffigisaannik ukiup matuma aallartilaarneranili isumaqatiginninniutigineqarsimavoq.