Aleqa: – Kisitsisit eqqortut Naalakkersuisut saqqummiuppaat

Sermitsiap KNR-llu nittartagaanni apriilip 24-anni atuarneqarsinnaavoq ICC-p siulittaasua Aqqaluk Lynge allaaserisami qulequtalimmi ´Naalakkersuisut sallupput´ imatut oqartoq issuarneqartoq:
– Aleqa Hammond Siumumeersoq akissuteqaammini allappoq, ICC Canada-p missingersuutimi 61 procentii Canadami aamma namminersortumi Nunavut-mi naalakkersuisunit matussusertittarai. Kisianni tamanna ICC Greenland-ip oqarnera malillugu kukkuneruvoq, taanna nalunaaruteqarluni ICC Canada-mi aningaasaliissutit 66%-ii pisortaneersuusut, kisitsisilli taamaaqatai Kalaallit Nunaannut tunngatillugu 60%-iusut.
Naalakkersuisut kisitsisinut saqqummiussaanni 61%-it Canadami aamma nunani namminersorlutik oqartussaasuni naalakkersuisunit tapiissutaasut ICC Greenland-ip allassimanerarmagu, tamanna eqqunngilaq.
Naalakkersuisut kisitsisinut saqqummiussaanni takuneqarsinnaavoq ukiumut naatsorsuusiorfiusumut 2012-2013-imut Nunatsiavut-mi aamma Nunavut-mi naalakkersuisunit tamarmik immikkut C$75.000 tapersiissutaasimasut, tamannalu ataatsimut katillugit Canadami naalakkersuisunit tapiissutaasut 65%-iusimanerannut nallersuuppoq:
– Canadami naalagaaffeqatigiinni naalakkersuisunit tapersiissutit. Aningaasat taakku ICC-mit qinnutigineqarnerisa kingorna taamaallaat pilersaarutinut piviusunut aningaasaliissutigineqartarput: 57%
– Nunatsiavut-mit tapersiissutit: 4%
– -Nunavut-mit tapersiissutit: 4%
– Ataatsimut katillugit pisortanit tapersiissutit: 65%

Taassuma saniatigut Naalakkersuisut Siulittaasuata Qanoruumi ulloq 9. april 2014 erseqqissarpaa, ICC Canadap kiisalu ICC Alaskap allaffissornermut aningaasartuutinut pisortanit tapiissutisiarisartagaat, ICC Kalaallit Nunaata Namminersorlutik Oqartussanit tapiissutisiarisartagaanit annikinnerujussuusut.
Naalakkersuisut akissuteqaataata aamma ICC Canada-mit ukiumut naatsorsuusiorfiusumut 2012-2013-mut tunngatillugu ilanngussap ilaliunneqartup imminnut sanilliunneranni takuneqarsinnaavoq akissuteqaammi kisitsisit allassimasut eqqortuusut.
ICC-ip, akissuteqaatip ilanngunneqartup suliarineqareernerata kingunerujussua ICC Canadamit naatsorsuutinik nutaajunerusunik pissarsisimanera, paasissutissat saqqummiunneqartut eqqortuunnginnerarlugit oqarsinnaanissamut tunngavissiinngilaq.
Naalakkersuisut piffissamut 2013-2014-imut naatsorsuutit nutaajunerusut 31. marts 2014 naammassineqartut, ICC Kalaallit Nunaannit innersuussutigineqartut, piginngilaat. Assilinerinik tunniusseqqullugu ICC qinnuigineqarpoq, aammalu Naalakkersuisut taassuma tigunissaa utaqqivaat.
– Naalakkersuisut akissuteqaamminni kukkusumik paasissutissiisimanerarneqarnerat eqqunngilaq. Taamaattumik Naalakkersuisunut pisuutitsiniaanerit ippassaq KNR-imi aamma Sermitsiami saqqummiunneqartut, aammalu Inatsisartut ataatsimiittarfianni ippassaq issuarneqartut tunuartinneqassasut kaammattuutigissavara.
Politikkikkut oqallinnitsinni inussiarnersumik nipeqartarnissaq, aammalu oqallinnerit – aamma tusagassiuutitigut – pissusiviusunik aallaaveqartarnissaat pingaaruteqarpoq aammalu salluneraanerit suliat imarisaannut pineqartunut tunngatillugu immikkut isornartoqarsinnaanera aallaavigalugu isummerfigineqanngitsut saqqummiunneqartariaqanngikkaluarlutik, Naalakkersuisut siulittaasuat Aleqa Hammond, Siumut, allappoq.