saqqumilaarneq
Aleqa Kinami Sinniisoqarfimmik ammaarusuppoq 2015-mi
Naalakkersuisut siulittaasuat Københavnimi apersorneqartilluni oqarpoq Kinami Sinniisoqarfimmik 2015-mi ammaanissaq sulissutigineqartoq
Naalakkersuisut siulittaasuat Aleqa Hammond, Siumut, Kalaallit Nunaat Kinami Sinniisoqarfimmik 2015-mi ammaanissaa naatsorsuutigalugu oqarpoq. Martin Breumimit Det Kongelige Bibliotekimi Københavnimi apersorneqartilluni oqarpoq.
- Aningaasanut inatsimmut 2015-moortumut siunnersuummi aningaasalerneqarnissaa siunnersuutigineqarpoq, Martin Breum oqarpoq.
Taama oqartoqarnera Aleqa Hammondip uppernarsarpaa.
- Sinniisoqarfimmik ammaarusuppugut 2015-mi, oqarpoq.
- Kalaallit Nunaat nunarsuarmi saqqulaarnissaa pingaaruteqarpoq. Nunarput annertuumik nunarsuarmioqatitsinnut tunniussassaqarpoq, Naalakkersuisut siulittaasuat apersorneqarnermini oqarpoq.
Naalakkersuisut Siulittaasuata Nunatta Washington D.C.-mi Sinniisoqarfittaarput nutaaq pisortatigoortumik ammassavaa septembarip 24-ani.