Aleqap atornerluinera

Aleqa karsimit tigusisimavoq

Naalakkersuisut siulittaasuata ilaatigut inuinnartut angalanermini timmisartumut billetsit, akunnittarfimmi minibarimilu aningaasartuutit landskarsimut akilersissimavai

Naalakkersuisut siulittaasuat Aleqa Hammond nammineq inuttut atukkaminut landskarsimut akiligassaqarpoq

Aleqa Hammond siusinnerusukkkut aningaasanik piumasaarsorsimasutut sammineqarsimavoq. Maannalu taamaasioqqissimavoq amerlanerungaatsiartunik.

Tamanna takuneqarsinnaavoq Inatsisartut Kukkunersiuinermut Ataatsimiititaliaata tusagassiorfinnut nalunaarutaani, tassani allassimalluni Naalakkersuisut siulittaasuat ukiup ataatsip ingerlanerani Namminersorlutik Oqartussat landskarsiannut katillugit 106.363,27 koruuninik akissaqalerseimasoq.

Akiligassat tassaapput inuinnartut angalanermi timmisartumut billetsit, tamatumani Naalakkersuisut siulittaasuata ilaquttaminut billetsit, aammalu neriniartarfimmiinneq minibarimiinnerlu Namminersorlutik Oqarrtussanut akilersittarsimallugit. Tamatuma saniatigut kukkunersiuisup Inatsisartunit toqqarneqartup paasissutissiissutaani allassimavoq Namminersorlutik Oqartussat sinniisoqarfianni inuinnartut nammineq aaqqissuussineq akilersinneqarsimavoq.

Kukkunersiuinermut Ataatsimiititaliaq naapertorlugu akiligassat ilarpaalui siulittaasup 2013-imi apriilip qiteqqunnerani Naalakkersuisup siulittaasunngorneraneersuupput, aammalu 2013-ip qiteqqunneraniit 2014-ip qiteqqunneranut arlaleriarluni aningaasat akilerneqarnissaat nukingisaarutigineqartarsimasoq. Akiligassat 2014-imi septembarip 8-anni akilerneqarsimapput.

Siullermiinngilaq

Inatsisartunut qinersinissaq sioqqullugu saqqummiunneqarpoq Aleqa Hammond pisuni arlalinni nammineq aningaasaatiginngisaminik ajornartorsiuteqartarsimasoq. Berlingske Tidendemi qulaajaanerup kingorna Siumup siulittaasuata nassuerutigaa 1995-imi mrsimi apriilimilu arfineq-marloriarluni dankorti atornerluttarsimallugu Hotel Godthåb-imi 5.1000 koruuninut pisinermut. 2008-mi aningaasaqarnermut nunanullu allanut tunngasunut naalakkersuisuugallarami aalakoorluni taxa-mut akiligassani qimarratigisimavaa.

Kukkunersiuinermut Ataatsimiititaliaq kukkunersiuisup paasissutissiinera tunuliaqutaralugu Naalakkersuisut siulittaasuat arlalinnik apeqquteqarfigaa. Akissutaatigut malunnarsivoq ajornartorsiut ukiuni arlalinni atuussimasoq; aamma siulittaasoq Naalakkersuisunut siulittaasunngunngikkallarmat; Taamaasilluni Naalakkersuisut siulittaasuat Namminersorllutik Oqartussanut 25.034 koruuninik akiligassaqarsimavoq arlaleriarluni akileqquneqartarsimasunik, Namminersorlutik Oqartussanit tusagassiorfinnut nalunaarummi allassimavoq.

Misissueqqusivoq

Aaatsimiititaliap paasissutissat pineqarsimasut tunuliaqutaralugit aalajangerpoq kukkunersuisoq Inatsisartunit toqqarneqartoq qinnuiginiarlugu misissoqqullugu Naalakkersuisoqarfinni allani pissutsit qanoq ittuunersut, paasiniarlugu Naalakkersuisuni nalinginnaasumik taamaasiortoqartarsimanersoq.

Powered by Labrador CMS