Aleqa: ICC pingaaruteqartuaannassaaq

Inuit issittormiut siunnersuisooqatigiit ICC issittumi sunniuteqarpoq Nunatsinni namminersornerulluni oqartussaaneq sioqqulluguli. Suliniaqatigiiffik suli siunissami pingaarutilimmik inissisimajumaartoq, Naalakkersuisut siulittaasuat Aleqa Hammond Siumumeersoq ICCp Inuvimmi ataatsimeersuarnerani oqalugiarpoq.

ICCp aqqaneq aappassaa ataatsimeersuarnera Inuvimmi ataasinngornermi ammaanersiorneqarpoq. Oqalugiarnerit arlallit pipput taakkulu ilagaat Aleqa Hammond 1977-mi ICC pilersinneqarneranut aamma Nunatsinni namminersornerulernermut 1979-mi pisumut kingumut qiviartoq.

Aatsitassat
- Isumaqarpunga ineriartornerni tamakkunani aqqusaakkatsinni ICC-kkut sulinermi isummersuutaasinnaasut, ilapertuutaasinnaasut aammalu isumassarsiaqarfigineqarsinnaasut ukiuni aggersumi suliniarnermi, Aleqa Hammond oqarpoq.

Issittumi nunat allat aatsitassarsiornikkut inerisaaneq aqqusaareerpaat. Maannalu Nunatta aatsitassarsiorfittut ingerlalernissaminut alloriarnerit annertuut aqqusaartussanngorpai. Oqallisaasullu ilagaat aatsitassarsiornermit Nunatta annertunerpaamik qanoq pissarsiaqarsinnaanera.

- Ukiup ataatsip matuma siornatigut uanga naalakkersuisooqatigiinni siuttuulerninnit aaliangiinerit pingaaruteqarluinnartut siuttuuffigaakka aaliangiinerit avaqqutaarneqarsinnaanngitsut aammalu nunatta siunissaa pillugu aaliangiinerit pingaaruteqarluinnartut, Aleqa Hammond oqarpoq.

Silaannaap allanngornerata aamma issittoq soqutigineqarnerulersippaa. Taamaattumik issittormiut pisinnaatitaaffitik pillugit ilungersortariaqarput.

Suleqatigiinneruneq
- Nunatta avataaniittut nunarsuarmioqativut pingaartitatsinnut tusarlissangutsigit tusarneqarsinnaanissarput qulakkeertariaqarparput. ICC pingaaruteqartumik inissisimasuassaaq akornatsinni nunarsuarmioqataanitsinnilu, Aleqa Hammond oqarpoq.

Puisit amiinik nioqquteqarneq EUp puisit amiinik eqqusseqqusiunnaarneranit eqqorneqarpoq issittumi piniartut eqqorneqaatigisaannik. Aleqa Hammond kaammattuivoq suleqatigiinnerunissami ICCp aamma issittumi naalakkersuisut akornanni.

Aleqa Hammondip oqalugiaataa tamaat - kalaallisut tuluttulluunniit - atuarsinnaavit talerpia tungaani linki atorlugu