nunanut allanut politikki
Aleqa Hammondip tuluit ambassadøriat naapippaa
Aleqa Hammondip Vivien Life-mik ataatsimeeqateqarnermini ilaatigut Tuluit Nunaata Kalaallit Nunaanni aningaasaliinissamut periarfissai oqaloqatigiissutigai
Naalakkersuisut siulittaasuata Aleqa Hammondip tallimanngormat ullaakkut tuluit Danmarkimi ambassadøriat Vivien Life Københavnimi Kalaallit Sinniisoqarfianni ataatsimeeqatigaa.
Kalaallit Nunaata Tuluit Nunaannut attuumassuteqarnera, Skotlandip namminersulernissaanik skottinik taasisitsineq, Namminersorlutik Oqartussanut inatsit aaamma Kalaallit Nunaata Danmarkillu akornanni pissutsit, Kalaallit Nunaanni aatsitassarsiornerup ineriartornera aamma Tuluit Nunaata Kalaallit Nunaanni aningaasaliinissamut periarfissai, tuluit ambassadøriannik ataatsimeeqateqarnermi oqaluuserineqarsimapput.
Tallimanngormat ataatsimiinnerup kingorna Aleqa Hammond USA-mut aallarpoq, ullumi aggersuni ataatsimeeqattaarluni ulapissalluni.
Aleqa Hammond FN-ip New Yorkimi Silap pissusia pillugu Ataatsimeersuarnerani aamma FN-ip nunat inoqqaaavi pillugit Nunarsuaq tamakkerlugu Ataatsimeersuartitsinerani peqataassaaq. Sapaatip akunnerani kingusinnerusukkut Washington DC-mukassaaq, USA-mi Kalaallit Nunaata sinniisoqarfia pisortatigoortumik ammariartorlugu.