Aleqa Hammond sulinngiffeqarnissamik qinnuteqarpoq

Inatsisartut ataatsimiinnerat aallartippat Inatsisartut Allattoqarfiat oqallisigisassamik qaqiliissapput marlunngornermi.

Siumumeersup Aleqa Hammondip Naalakkersuisunit Inatsisartuniillu sulinngiffeqarnissamik qinnuteqarpoq aningaasanik atuisimanera kukkunersiuisut qulaajaaneranni. Qinnuteqaataata akuerineqarnissaa naatsorsuutigineqarpoq.

- Aleqa Hammondip Inatsisartut ataatsimiinnerat ammarlugu oqalugiareeruni pineqartoq Inatsisartuni oqallisigineqassaaq, Inatsisartut siulittaasuat Lars-Emil Johansen, Siumut, Inatsisartut Allattoqarfianni ataatsimeereerlutik oqarpoq.

Immikkut ittumik ataatsimiinneq
Inuit Ataqatigiit, Demokraatit, Partii Inuit aamma Partii Naleraq Aleqa Hammondip nunatta karsianit aningaasanik atuisimanera Inatsisartuni pingasunngornermi oqallisigineqassasoq Inatsisartut Allattoqarfiannut qinnuteqaateqarput.

- Inatsisartut Allattoqarfiannut qinnuteqaat anngunneqarpoq ataasinngornermi. Taanna pillugu Inatsisartut oqallitsinneqassasut Inatsisartut Allattoqarfiat aalajangerpoq, oqallinneq pingasunngornermi pissaaq, Lars-Emik Johansen ilisimatitsivoq.

Kuupiup paarlatsissaa
Naalakkersuisut siulittaasorisimasaata Kuupik Kleistip Inuit Ataqatigiinneersup Inatsisartuni ilaasortaajunnaarnissaminut qinnuteqaataa Inatsisartut Allattoqarfiannit aamma suliarineqarpoq. Kuupik Kleist nunatta karsianit 25.034 koruuninik atuisimanini pissutigalugu Inatsisartunit ilaasortaajunnaarniarluni ataasinngormat aalajangerpoq. Aningaasanik atuisimanini nassuerutigereerpaa.

- Qinnuteqaatigineqartoq Inatsisartut Allattoqarfianit akuerineqarpoq kiisalu paarlattaasussaq aamma qaaqquneqassalluni, Lars-Emil Johansen oqarpoq.

- Paarlatissatut siullertut Stine Egede Nørbæk Qaqortumeersoq inissisimavoq. Kommune Kujallermi kommunalbestyrelsimi ilaasortaavoq, Isumaginninnermik Ingerlatsivimmi siulittaasuuvoq. Inatsisartut ataatsimiinnissaannut marlunngornermi anngussinnaanngilaq. Taamaattumik Kuupik Kleistip paarlatsissaatut Astrid Fleischer Rex aggersarneqarpoq, Lars-Emil Johansen ilisimatitsivoq.

Isumaliutissiissut utaqqineqartoq
Aleqa Hammondip nunatta karsianit 106.363,27 koruuninik atuisimanera kinguneqartinneqassanersoq pillugu Inatsisartut siulittaasuat ima oqarpoq:

- Inatsisit tunngasiusut malinneqartariaqarput. Kukkunersiuinermut ataatsimiititaliamit isumaliutissiissummik suli tigusaqanngilagut. Taassuma tunniunneqarnissaa utaqqisariaqarparput, tamannalu Inatsisartuni oqallisigineqarumaarpoq tunniunneqareeriarpat. Kukkunersiuisumit nalunaarfigineqareerpugut Namminersorlutik Oqartussat inatsisaat unioqqutinneqarsimasut, aamma suliami inatsisaasut malinneqarsimanngillat. Annertuumik unioqqutitsisoqarsimanersoq suli ilisimanngilarput. Kukkunersiuinermut Ataatsimiititaliap isumaliutissiissutaani tamanna paasinarsiumaarpoq. Suut tamarmik soorunami misissorneqassapput. Uanili pineqartumi inatsisivut atorneqassapput, taamaattumik isumaliutissiissut aalajangiisoqannginnerani utaqqineqarpoq.

- Aleqa Hammondip sulinngiffeqarnissamik qinnuteqaateqarneranut isumaliutissiissut pineqarpa, taannalu suli naammassisimannginnera pissutaava?

- Aap.

- Taamaattumik ima isumaqarpa, Kukkunersiuinermut ataatsimiititaliap isumaliutissiissutaa naammasseriarpat oqallisigineqalerpallu taava sulinngiffeqarnera atorunnaassasoq?

Aap, Lars-Emil Johansen oqarpoq.

Periarfissarpassuit suli ammasut
- Siumumi ilaasortaavutit. Pisoq Siumumit qanoq nalilerneqarpa?

- Siumumi siulittaasut tamanna pillugu aperisariaqassaatit. Siumumili una pisoq naammassineqarnissaa kissaatigaarput, tamanna aamma partiitsinni anguniagaraarput. Pisumi qulaajagassat tamarmik qulaajarneqassapput. Paasitinneqarnerput najoqqutaralugu aalajangiissaagut. Isumaliutissiissut naammassippaat Siumut aatsaat aalajangiissaaq. Periarfissarpassuit suli amerlasuut ammapput. Siumup siornatigut takutereerpaa pisut ilungersunartut qaangersinnaallugit, Naalakkersuisuni aamma Siumumi siulittaasuusimasoq Lars-Emil Johansen oqarpoq.