Aleqap atornerluinera

Aleqa Hammond: Aamma Kuupik taamaasiornikuuvoq

Naalakkersuisut siulittaasuat, landskarsimik nammineq aningaaserivimmisut atuisimasoq, imminut illersorluni oqarpoq Naalakkersuisut siulittaasuattut siulini Kuupik Kleist aamma taamaasiortarsimasoq

Aleqa Hammond
Naalakkersuisut siulittaasuata Aleqa Hammondip ilaatigut Hans Egedep Illua ernissami apersortinnerani festerfittut atorsimavaa.

Aleqa Hammond nammineq atugassaminik landskarsimit 106.363.27 koruuninik atornerluisimanermini suut tmaasa atorlugit allanik pisuutitsiniarsarivoq. Aningaasat tamakkua ilaatigut atorsimavai timmisartumut billetsinut, akunnittarfimmi aningaasartuutinut kiisalu neriniartarfimmi nerinermutd minibarimiinnermullu.

Atornerluineq tamanna Inatsisartut Kukkunersiuinermut Ataatsimiititaliaata qaqutigoortumik sakkortuumik uparuarsimavaa.

"Pissutsit pineqartut Namminersorlutik Oqartussat iluannit malittarisassanut nalinginnaasumillu ingerlatsisinnaanermut malittarisassanut naapertuutinngillat, ataatsimiitditaliallu pineqartut erloqinartorujussuartut isornartorujussuartullu isigai«, ataatsimiititaliaq qanittukkut Aleqa Hammondimut allappoq. Tamanna peqatigalugu erseqqissaatigineqarpoq ataatsimiititaliap pissutsit ima isornartoqartitsigalugillu killissamik qaangiivallaartigitigai, ataatsimiititaliap Inatsisartunut ilaasortat atornerluinermik tamatuminnga paasissutissittariaqarlugit. Tassami kukkunersiuinermut ataatsimiititaliap Aleqa Hammondimut allagaata aappaani allassimavoq:

»Naalakkersuisut siulittaasuata malittarisassanik ilisimasaqannginneraaneranik paasissutissiissutit ataatsimiititaliap utoqqaatsissutissarsiuinnarnertut isigai, pisimasunut sumilluunniit utoqqatsissutaasinnaanngitsutut. Taamaattumik tupaallannarnavianngilaq naalakkersuisup landskarsip aningaasaatai nammineq aningaasaatimisut atorsinnaanngimmagit«.

Aleqa Hammondip atornerluisimanini nassuerutigiumanngippasippaa. Kukkunersiuinermut Ataatsimiititaliaq ersarissumik nalunaaruteqaraluartoq Aleqa Hammond KNR-mut nassuiaavoq angalatitseqatigiiffiup kisimi pisuussutigigaa ilaquttami timmisartumut billetsiisa landskarsimit akilerneqarsimanerat. Kukkunersiuinermut Ataatsimiititaliamut illersorluni nassuiaanermini Naalakkersuisut siulittaasuattut siulini Kuupik Kleist akulerussimavaa.

Taassuma tikkuarpaa Kuupik Kleist siorna januaarip 4-aanniit 15-iannut angalaqateqarsimasoq 25.034 koruuninik nalilimmik. Aningaasallu Aleqa Hammond naapertorlugu utertinneqarsimanngillat. Ernissamilu apersortinnerani Hans Egedep Illuata ilaqutariit festernerannut atorneqarsimanera sanilliunneqarsinnaasoq ilassinninnertut, soorlugooq Kuupik Kleist tassani taamaasiorsimasoq taamanikkut partiimi siulittaasunngorami.

Kuupik Kleist Sermitsiaq.AG-mut nassuiaavoq Hans Egedep Illua nammineerluni attartorsimanagu, partiilli attartorsimagaa. Akerlianik nassuerutigaa Namminersorlutik Oqartussanut akiligassaqarluni. Tassani pineqarpoq Dronningip Ukiortaami Ilassinninneranut aappanilu qaaqqusaallutik peqataajartorluni angalanermini nuliilu qitornatik ilagisimagamikkit.

– Pisimasunut allattoqarfik allalluunniit pisuutitassaanngillat. Uanga nammineq sianiilliorneraara arajutsisimaninnillu pissuteqarpoq. Aningaasat soorunami ingerlaannaq taarserneqarsimasussaagaluarput. Uangali qanoq iliorsimanera qanorluunniit iliorsimannginnera allat taamaasiornissaannut utoqqatsissutissaanngilaq. Pisimasoq tamarmi ajuusaarnartorujussuuvoq Piaarnerpaamillu iluarsiniarneqartariaqarluni, Kuupik Kleist oqarpoq.

Powered by Labrador CMS