Aleqa FN-imi: Inuiaat kalaallit suli sorsuuteqarput

Kalaallit Nunaata oqaluttuarisaaneranut pingaarutilimmik ataasinngormat pisoqarpoq.

Naalakkersuisut siulittaasuat Aleqa Hammond, Siumut, nunap inoqqaavi pillugit Nunarsuarmioqatigiit Ataatsimeersuarneranni nunat 90-t peqataaffigisaanni, oqalugiarpoq.

Ataatsimeersuarnerup ammarnersiorneqarneranut atatillugu oqalugiartut pingaarnerit ilagaat Naalagaaffiit Peqatigiit Allattaanerat Ban Ki-moon aamma Norgemi Saamit inatsisartuisa præsidentiat Aili Kestitalo.

Naalakkersuisut Siulittaasuat Aleqa Hammond aamma danskit nunanut allanut ministeriat Martin Lidegaard peqatigiillutik 'nunap inoqqaavisa nuna tamakkerlugu najukkanilu atuutsinneqarnissaat' pillugu saqqummiussipput, Namminersorlutik Oqartussat tusagassiutinut nalunaarummi allappoq.

Qulequttat Aleqa Hammondip saqqummiussinermini erseqqissuliuutigisai tassaapput Nunatsinni inatsisitigut ataataqanngitsut inissisisimanerat pillugu saqqummiussineq kiisalu Nunatsinni Saamaateqatigiinnissamut Ataatsimiititaliarsuarmik pilersitsisimanerup tunngavigisaa.

- Inuiaqatigiit kalaallit – inuiaqatigiit nunasiaataasimasut allat assigalugit – suli inuuniarnikkut ajornartorsiutinik annertuunik, nunasiaataasimanermut atuumassuteqartunik kiisalu inuuniarnikkut akornusersuutaasunik naleqartitanillu ileqqutoqqanik sukkasuumik ineriartupiloornermik pissuteqartumik annaasaqarnermik suli sorsuuteqarput, Aleqa Hammond oqalugiarnermini ilaatigut oqarpoq.

Meeqqat
Ukioq manna tikillugu, danskit Folketinngianni inatsit nutaaq akuersissutigineqarmat, meeqqat Kitaani 1963 tikillugu inunngorsimasut Nunattalu Avannaanni Tunumilu 1974 tikillugu inunngorsimasut inatsisitigut ataataqarnertik pillugu akuerineqarnissaminnut periarfissaqarsimanngillat, Aleqa Hammondip ilaatigut tikkuarpaa.

- Tamanna tunngavigalugu meeqqat taakkua nalinginnaasumik kingornussisinnaasimanngillat, 'inatsisitigullu ataataqanngitsutut' ilaqutaqarnerminnillu akuerineqarnissaminnik pisinnaatitaaffeqaratik immikkoortitaasimapput, Aleqa Hammond oqaluttarfimmit oqarpoq.

Saammaasseqatigiinneq
Aleqa Hammondip Saammaasseqatigiinnissamut Ataatsimiititaliarsuarmik pilersitsineq aamma eqqartorpaa. Danmarki tassunga suleqataarusunngitsoq ilisimaneqarpoq.

- Tamanna Naalakkersuisut ukioq manna Saammaateqatigiinnermut Ataatsimiititaliasualiorsimanerannut tunngaviuvoq, taamaasilluni Nunatsinni partiit akimorlugit inuiaqatigiit ammasumik oqallissinnaanissat anguneqarniassamat, taamaasilluta Nunatsinni aalajangiinerit siusinnerusukkut pisimasut, taakkualu kingunerisaat paasilluarnerulerniassagatsigit oqaloqatigiissutiginerulluarnerussagatsigillu, Naalakkersuisut siulittaasuat nassuiaavoq.