Aleqa apersorneqarluni eqqunngitsumik ilisimatitsisoq
- Nunatta pisortaata nunatta oqaluttuarisaaneranik saqqummiussinermini naatsorsuutigineqartariaqarpoq pissutsit piviusut naapertorlugit ilisimatitsissasoq. Juliane Henningsen, IA, taamak oqarpoq Aleqa Hammondip tuluttut apersorneqarnera pillugu
Aleqa Hammond, Naalakkersuisut siulittaasuat, Naalakkersuisut pisortatigoortumik nittartagaagut tuluit oqaasii atorlugit imminut saqqummiussuunnera, peroriartornini, Kalaallit Nunaat taassumalu oqaluttuarisaaneranik oqaluttuartoq tusarnaarlugu nuannerluinnarpoq.
Taamak allappoq Juliane Henningsen, taassuma erseqqissaatigalugu, apersorneqarneq taanna inuppalaartorujussuusoq ileqqutoqqat, ataqqinassuseq nunallu pinnissusaa eqqartorneqarlutik:
Kisianni nunamik aqutsisup imminut aamma nunap taassumallu oqaluttuarisaaneranik eqqartuinissani aalajangiusimaguniuk, naatsorsuutigineqartariaqarpoq pissutsit piviusut saqqummiutissagai. Aleqali taamaaliunngilaq.
Aleqa oqarpoq: ”Ukiut qulit matuma siorna namminiilivinnissaq oqallisiginngilarput, oqaaserluunniit taanna oqaatsitsinnut ilaanngilaq. ”
Juliane Henningsenip erseqqissarpaa, naalakkersuisut siulittaasuannut tulluartuussasoq akuersaaqqullugu, qanga politikeriusimasut maannamullu politikerit namminiilivinnissaq pillugu suliaqarsimammata.
- Aleqa Hammond eqqaasittariaqarparput namminiilivinnissamik isuma nutaajoqqajanngimmat. Taamaattumik apersorneqarnermi oqaluttuarisaaneq pillugu paasissutissanik eqqunngitsunik imaqarmat. Taamaattumik neriuutigisariaqarparput naalakkersuisut siulittaasuata siunissami apersorneqarnermini eqqortunik saqqummiussisarnissaa.
Atugarissaarneq?
Eqqunngitsumik ilisimatitsinerup saniatigut Juliane Henningsen aperivoq, Aleqa Hammondip atugarissaarnermik annaasaqarusunnersoq? Apersorneqarnerminimi oqarami, namminiilivinneq anguneqarsinnaasoq atuagrissaarneq annaassagaluaruniluunniit, kalaallit namminiilivissinnaanerat naalagaaffiit mikisut namminiilivissimanerannut assersuullugu, aningaasaqarnermik ingerlalluartumik pilliuteqaraluarlutilluunniit.
Peqqinnissaqarfimmik akeqanngitsumik atuisinnaaneq, akeqanngitsumik ilinniarsinnaaneq, utoqqalinersiat pilliutigaluit nunatsinni naligiinngitorujussuarmik atugassaqarneq suli qaffanniarpaa?, Juliane Henningsen aperivoq, taanna isumaqartoq apersuinermi oqaaserineqartuni naalagaaffiup pisortaa aningaasaqarnermut akisussaassusermik amigaateqartoq. Aleqa Hammondip nunatta siunissaanut suna takorluugaraa? Inunninuna suna naatsorsuutigigaa aamma inuiaqatigiinni atukkatigut naligiinnginnerujussuaq suli qaffanneruniaruniuk, sunaana anguniaraa? Tamakkua uagut nammineq tusagassiuutitsinnut imaluunniit nunat tamalaat akornanni tusagassiortunut naalakkersuisoqarfimmit tappavannga oqaatigineqarsinnaanngigunarput.
Apersorneqarneq uani http://naalakkersuisut.gl/~/media/Nanoq/Files/Lydfiler/Juni%202013/Interview%20Aleqa%20Hammond%20060613.mp3 tusarnaarsinnaavat.