nytårstale
Aleqa: 2013 ukioq allanngorfiuvoq
Naalakkersuisut siulittaasuata Aleqa Hammondip, Siumut, uklortaami oqalugiaataa tamaat atuaruk
– Ukioq 2013 amerlasuutigut allanngorfiuvoq. Aalajangiinerit pingaarutillit arlallit pipput. Aalajangiinerit taakku tamarmik illit, uanga tamattalu inuiaqatigiinnik imminnut napatittut toqqammavissaannik pilersitsiniarnitsinni suliniarnitsinnik siunertaqarput. Inuiaqatigiimmi nukittunerusut pitsaanerusullu aqqutissiuunnissaat Naalakkersuisut suliaanni pingaarnersaavoq. Ullumikkut aalajangernerit pisariaqartut aalajangiiffiginngikkutsigit, tamanna kinguaariinnut tullernut kinguneqartussaavoq. Taamaammat utaqqinata massakkut iliuuseqarpugut.
Taamatut oqarpoq Naalakkersuisut siulittaasuat Aleqa Hammond, Siumut, Naalakkersuisut siulittaasuattut Nuummi Hans Egedep Illuanit ukiortaami oqalugiaqqaarnermini.
Aalajangiinerit angisuut pingaarutillillu
– Aatsitassat uranimik akoqanngilluinnarnissaannik piumasaqaammik atorunnaarsitsineq, Naalakkersuisut aalajangigassanik annertuunik pingaarutilinnillu aalajangiinissamut sapiissuseqarnerannut assersuutissaavoq. Atorunnaarsitsineq taanna massakkorpiaq aatsitassanik uranitalinnik qalluilernissatsinnik kinguneqassanngilaq. Atorunnaarsitsinerup uagut Danmarkillu peqatigiilluta uranimik qalluinissamut maleruagassanik suliaqalernissarput kingunerissavaa. Malittarisassat taakku nunarsuarmioqatigiit akornanni avatangiisinut peqqissutsimullu malittarisassanik sakkortunerpaanik naammassinnissapput. Suliassarlu taanna aatsaat naammassippat, Naalakkersuisut aatsitassarsiorfiit ataasiakkaat qinnuteqaatigiumaagaat piviusut isummerfigissavaat, Aleqa Hammond erseqqissaavoq, tamatumalu kingorna inuit assigiinngitsumik pissuteqartumik suliffissaaleqisut suliffeqanngitsulluunniit tikippai.
Asserpassuit takukkit "2013-imi politikkikkut torrallatat"
Suliffissaaleqineq annikilisarneqassaaq
– Ukioq manna oktoberimi innuttaasut 3.000-it missaasa suliffissaaleqisutut nalunaarsorsimanerat unammilligassaavoq alla, peqatigisaanillu sulisinnaasut suli amerlanerusut pisariaqartinneqarput. Suliffissaaleqisut annikinnerpaaffimmiitinnissaannik Naalakkersuisut uagut anguniagaqarput.
– Inuusuttut suliffissaaleqinerisa annertusiartornera sorsugassatta ilagaat. Inuusuttut aatsaat taamak amerlatigisut ullumikkut suliffissaaleqinermik eqqugaapput. Tassanilu sapinngisamik amerlanerpaat inuusuttunut ilinniarfinnut isertinnissaat anguniagaraarput. Inuiaqatigiittummi inuusuttatta taamak amerlatigisut inersimasutut inuunermik aallartinnerminni, taamaalillutillu imminnut napatittussanngornerminni aallartinnerlunnerat akuersaarsinnaanngilarput. Inuiaqatigiittut inuusuttut sapinngisamik annertunerpaamik ikorfartornissaannut pisussaaffeqarpugut, Naalakkersuisut siulittaasuat tikkuaavoq oqarlunilu inuiaqatigiinni ilinniartitaanerup qaffassarnissaa Naalakkersuisut anguniagarigaat.
– Kikkut tamarmik ilinniagaqalersinnaanngitsut imaluunniit najukkaminni suliffeqalersinnaannginnerat nalunngilara. Tamassili sumiiffissinni suliarisasi pillugit qujassuteqarfigaassi.
Sammisat allat
Aleqa Hammondip ukiortaami oqalugiaammini aamma tikippai attaveqarneq, kommunit aaqqissuuteqqinneqarnerat, peqqissuseq, aalisarneq, nunalerineq, nunanut tamalaanut attuumassuteqarneq aamma Danmarkimik saammaateqatigiinnissaq.
Naalakkersuisut siulittaasuata ukiortaami oqalugiaataa tamaat kalaallisut qallunaatullu atuaruk pdf-filine allaaserisap talerpia'tungani
Oqalugiaat qanoq isumaqarfigaajuk?