Akutaaneq Kreutzmann Mexicomut aallarpoq

Sorpassuit GOG-p anguniagassarai holdi arfininngormat 350 kilometeringajaat bus-erlutik Thistedimi Thy Hallen-imi Mors-Thy Håndbold unammiartoramikku.
GOG unamminerni sisamani ajugaasimanngilaq slutspil-imilu, sæsonimi anguniagarujussuarmi, inissaq taama qularnaatsigiunnaarsimavoq, kalaallinillu isigalugu ajugaappata Akutaaneq Kreutzmann Mexicomut aallarsinnaalissaaq nunanut allanut unammisartunut peqataajartorluni. "Bette Balkan", angerlarsimaffimminniittut unammisarfeeraat, naatsorsuutigisanut naapertuuppoq. Unammisarfeeqqami qoqernaannavippoq. Oqartoqartarpoq isiginnaartut holdip arfineq-pingajorisaraat, Thistedimilu taamaappoq.
Angerlarsimaffimminni unammisut aallartilluarnerupput, pingaartumik målmand Søren Petersen unammilluaqaluni. GOG-mi aamma qujanartumik Akutaaneq Kreutzmann arsarluaqaaq, ilaatigullu isertitat siulliit marluk isertillugit angerlarsimasullu assersuisui eqqissisimatissanagit.
Tamarmik ajugaasinnaapput
Muminnermi naligiipput 14-14-erlutik, unamminerullu immikkoortuata aappaata aallartinnerani GOG 15-18-imik siuarmat amerlasuut isumaqarput unammineq aalajangerneqalersoq. Mors-Thy-li sukkasuumik sisamaraarmat taamatut isumaqartoqarunnaarpoq. Unamminerup sinnerani naligeeqaat, kikkulluunniillu ajugaasinnaapput. Unaminerup naajartornerani GOG-ermiut silatusaarnerupput iluatsitsinerullutillu, unamminermilu pissanganartumi 26-27-mik ajugaallutik. Decembarip 28-annii ajugaagamik ajugaaqqipput, bus-imillu sivisoorsuarmik angerlarnissaq soqutaajunnaarpoq.
Akutaaneq Kreutzmann sisamanik isertitsivoq, islandimiorlu nunanut allanut unammisartoq Snorri Gudjonsson peqatigalugu GOG-mi arsarluarnersaalluni. Minik Dahl Høegh asuli kimmimigut ajoquteqarpoq Thistedimukaqataananilu.
Slutspillimut?
Tunngaviusumik unammiuaarnermi unamminerit marluk sinnerupput. Holdit pitsaanerit arfineq-pingasut slutspillimut anngutissapput. GOG normu 5-iuvoq, normu 9-mit Skanderborgimit 9 pointinik siuarsimanerulluni, taamaattumik suli anngutinngitsoorsinnaavoq. Sungiusaasuunermut Jakob Larsenimut ajugaaneq eqqissiallannartorujussuuvoq, tamannalu kikkut tamarmik takusinnaavaat dommerit marluk naggammik siggarmata. Sermitsiaq.AG-mut Jakob Larsen ilaatigut oqarpoq:
– Allat unammisarfianni tamaviaarnartorujussuarmi holdi tupinnaannartumik takutitsivoq. Unammisartut piumassuseqarluarput unamminerlu naallugu akiuullutik. Ilimagisatsitut ajornakusoortigaaq. Ullumikkut ajugaanerput pingaarutilerujussuuvoq. Taamaattumik slutspillimut anngunnissamik sinnattu suli atuuppoq.
Nunanut allanut unammisartut ornippai
Akutaaneq Kreutzmann sapaatiummat ullaakkut Odensemit Mexico City-mut aallarpoq sivisuumik angalassallluni. Nunanut allanut unammisartut unamminerini siullerni pingasuni ilagissavai, neriupporlu juunimi Amerikap Nunavissuani pissartanngorniunnissamut, Uruguay-mi ingerlanneqartussamut, anngutissallutik. Akutaaneq Kreutzmann sisamanngorpat unnukkut Mexicomit aallassaaq, arfininngorpallu GOG-p grundspillimi naggataamik Gudme-mi TMS Ringsted-imut unamminissaani peqataasinnaassaaq. Taamaasilluni pingasunngorpat unnukkut GOG-p Ålborgimut unamminissaani ajornakusoortumi Akutaaneq Kreutzmann peqataasinnaanngilaq.