naatsorsuutit
Akunnittarfiup amigartoorneq sinneqartoornermut mumisikkaa
Ukiuni arlalinni aatsaat siullermeerluni Hotel Kangerlussuaq sinneqartooruteqarluni saqqummiussaqarpoq.
2014-imi naatsorsuutini 7,6 millionit koruuninik amigartooruteqarneq, maanna ukiup qiteqqunnerani naatsorsuutini killormut saatinneqartoq, Mittarfeqarfiit akunnittarfimmik piginnittuusut ilisimatitsipput.
Pisiortorfigisat allanngortinneqartut
Akunnittarfiup pisiortorfippassuit taarsersorpai, errorsineq nammineq suliarilerlugu aamma ataatsimiittarfik iluarsaallugu, tamannalu pitsaasumik angusaqarfiuniarpasippoq. Sinneqartoorutit millionit affaata missaaniittut, ingerlatseqatigiiffiup ilisimatitsissutigaa.
- Aasaanerani tikeraartoqarluarpugut, ingerlalluartumillu aaqqissuussilluta, aqutsisoqatigiit aamma sulisut kajumissusillit pissutaallutik. Neriniartarfiullu nutaap ineriartortinnissaanut aningaasaliinikuuvugut, sullitagullu sullilluarniarniarnerulerneqartut misigisimavunga. Aasaanerani unnuisorpassuit maanna ukiaanerani ukiuuneranilu ataatsimiittussanit taarserneqassapput, Morten Nielsen tusagassiuutinut nalunaarummi taama oqarpoq, tassanilu atuarneqarsinnaavoq, nittartakkakkut inniminniisoqarsinnaalersimasoq.
Mittarfeqarfiit pisortaat Marie Fleischer oqarpoq:
- Aningaasaliissutit kingulliit akunnittarfiup sinneqartoorutaanit aningaasalersorpagut, ineriartornerlu pitsaasorujussuuvoq. Iluanaarutit annertusiartornissaat ingerlatiinnarniarparput, aningaasaliinerillu angalasutsinnut atukkat pitsaanerulersinniarlugit ukkatarinerussavagut. Hotel Kangerlussuup aningaasaqarnera ukiuni kingullerni Mittarfeqarfiit pisortaannit maluginiarneqartorujussuunikuuvoq, taamaattumillu uteriilluni periusissiorneq pitsaasunik angusaqarfiusoq nuannerpoq.