neriniartarfiit
Akunnittarfinnit pisortat ulloriannassinnaanertik sinnattuaqissutigiunnaaraat
Ippassaq Michelinni ullorissanik pilerigineqarluartunik agguaassinerani Savalimmiut Islandilu tamarmik ataatsimik tunineqarput. Kalaallit Nunaata ataqqinaataasoq Michelinimi ilaalernissatik naatsorsuutigissanngilaat. Sooq? Nassuiaataa atuaruk.
Kalaallit Nunaanni neriniartarfiit nersualaarneqartartut – Nuummi Sarfalik Hotel Hans Egedemiittoq Ilulissanilu Ulo Hotel Arcticimiittoq – Michelinnimut ilanngunnissartik anguniagarinngilaat.
- Akisuallaaqaaq, neriartortartugullu nerisassanik soqutigisaqarpallaanngitsut nerisassanulli piisaarpallaangitsut annaaginnassuagut, pisortaanerit isumaat assigeeqalutik taama oqarput.
Akunnittarfiuvugut
- Unnuisut, ataatsimiigiat, ullaakkorsiortitsinerit roomservicellu iggavimmi sulisutta assigiinngitsorpassuit sullittassarivaat, akunnittarfiuvugut tamanna eqqaamaneqassaaq, Hotel Arcticip pisortaanera Erik Bjerregaard, nassuiaavoq.
Atuaruk: Savalimmiut Islandilu pernaammik Michelinimik ullorialerneqartut
Illoqarfiit pigaannersaanni suleqataa, Jørgen Bay-Kastrup aamma taama isumaqarpoq:
- Piviusorsiornerunngilaq, Michelinilimmik neriniartarfiuteqassagaanni 100 procentimik suliamut sammisariaqarpoq, isertartugullu sullittakkavut eqqornagit tamanna angusinnaanngilarput
Qaffasissumik anguniagaqarput – ullorissat pillugit
Sullittatsinnut iluarisimaarneqartumik qaffasissumik neriniartarfiuteqarnissarput orniginartinneruarput, pisortaanerit nassuiaateqarput.
Nunani avannarlerni Michelinimut assigusoq piumasaqaataalu annikinnerusut, White Guidemi Ulo Sarfalillu ilanngunneqarsimanerat, Erik Bjerregaardip iluarisimaarpaa.
- White Guidemi peqataanerput nuannaarutigalugulu tulluusimaarutigaarput. Tasssanimi iggavitsinnimi sulinerput nersorneqarpoq. Iggavitsinni nerisassiarineqartartut illoqarfimmeersut atornissaat pingaartitarivarput, akunnittarfiup pisortaanera Ilulissaneersoq nassuiaavoq.
Ulo allineqarpoq
Junimi neriniartarfimmi Ulomi immikkoortoqarfik nutaaq ammassaaq, inip pequsersornera, iseruminarnera, qaamanera nerisassallu toqqarneqarsinnaasut pitsaanerussallutik.
- White Guidemut ilanngunneqarsimanerput iggavimmi sulisutsinnut sunniuteqarsimavoq. Anguniagaqartaratta sulisorisagut sivisunermik suliffimminnut atanerulersimapput, Erik Bjerregaard oqarpoq.