akunnittarfiit
Akunnittarfinni unnuisut amerlanerusut
Akunnittarfiit ukiup ataatsip ingerlanerani unnuinernik 14 procentimik annertunerusumik tunisaqarput
Akunnittarfinni unnuisartut amerliartorput, Nunatsinni Naatsorsueqqissaartarfiup kisitsisaataasa kingulliit tamanna takutippaat.
Tassami ukiormanna kvartalip aappaani unnuinerit 64.821-iupput, tamannalu ukiup siulianut piffissami taamaalineranut sanilliullugu 14 procentimik amerleriaateqarput.
Unnuinerit inunnut 24.595-inut agguataarneqarput, tamannalu aamma 11,3 procentimik amerleriarneruvoq.
Takornariat amerleriaateqarpianngitsut
Naak akunnittarfinni unnuinerit amerleriaraluartut, takornariat nunanit allaneersut unnuisartut amerleriaateqarpianngillat. Tassani amerleriaataasoq 3 procentiuvoq.
Tupaallaataanngitsumik unnuisartut 56,1 procentii Nunatsinneersuupput, 21,6 procentii Danmarkimeersuullutik.
Nunatsinni Naatsorsueqqissaartarfiup unnuisarfinnit paasissutissat naapertorlugit kisitsisinik takusassianik suliaqartarput.