takornariaqarneq
Akunnittarfinni unnuisartut siorna ikileriarput
Nunatsinni takornariat unnuisartut siorna 2 procentimik ikileriarsimapput. Taamatut saqqummiussivoq Kalaallit Nunaanni Naatsorsueqqissaartarfik
2014-imi unnuinerit katillugit 209.715-iusimapput. Tamanna ukiup siulianut sanilliullugu 4.297-inik procentinngorlugu 2,0 procentinik ikileriarneruvoq. Tamanna Naatsorsueqqissaartarfimmit kisitsisit kingulliit takutippaat.
Inuit 2014-imi akunnittarfinni unnuisut 79.922-usimapput.
Unnuisartut 1.314-inik ikileriarsimapput, ukiumut siulianut sanilliullugu procentinngorlugu 1,6 procentiulluni.
Nunanut allanut angalasut amerlanerulerput
Tamanna peqatigalugu Kalaallit Nunaanni Naatsorsueqqissaartarfimmit kisitsisit nutaat takutippaat nunanut allanut angalasut amerliartortut. Siorna Nunatsinnit avammut timmisartumut ilaasut 525-nik amerleriarsimapput, tassa ukiumut siulianut sanilliullugu 0,8 procentimik amerleriarlutik.
Ukiumut nunanut allanut aallartartut 2001-imiilli 10.000-ingajannik amerleriarsimapput.
Siorna nunanut allanut aallartut 69.580-iupput, 2001-imi 59.989-iusimallutik.
Kisitsisini nutaani ajoraluartumik takutinneqanngilaq angalasut nunatsinnukartartut piffissami tassani qanoq ineriartorsimanersut.