Nuanneq

Akunnittarfiit sinerissamiittut arlallit ulikkaartut

Akunnittarfiit sinerissamiittut maanna ulikkaarlutik aasamut inniminnerneqalereerput, sianeqattaarluni misissuinerup tamanna takutippaa

Ilulissat ukioq manna takornariaqarluarniarpasippoq. Illoqarfiilli aamma allat aasaanerani sulinngiffimmi angalaffiulluassamaarput

Nunatsinni takornariaqarnermut atatillugu immaqa siumukartoqalerpoq. Tamannami Sermitsiaq.AG-p akunnittarfinnut illoqarfinni takornariaqarfiusartunut sianerluni paasiniaanerani erserpoq, tassami aasaq 2015-imut inniminniinerit maanna ingerlallualereerput.

Hotel Arctic Ilulissaniittoq, ukioq 2014 naatsorsuiffiusumi angusarissaarnikoq, aasaanerani amerlasuunik unnuisoqarluarnissartik qilaanaaraat.

- Juunimi unnuinissamut inissaqalaarpoq, juli aamma aggustip qaammataata ilarujussua ilanngullugu ulikkaaqqavoq, Hotel Arctic innimminniisarfianit Else Marie Petersen oqaluttuarpoq.

Atuaruk: Hotel Arctic ukiumi naatsorsuusiorfiusumi rekordileeqqippoq

Akunnittarfiit aamma Ilulissaniittut allat aasaanera tamakkingajallugu ulikkaarlutik inniminnerneqareerput. Juuni qaammataa inniminnerneqarluni ulikkaangajalerpoq, juulimi aggustimilu ulikkaaqqavugut, Hotel Hvide Falk allaffianit taama paasissutissiipput. Taanna ullormut 90-inik unnuisoqarsinnaavoq.

Sermitsiaq.AG-p sianerluni paasiniaanerani aamma Ilulissani akunnittarfimmi allami, tassa Hotel Icefiordimi, marsimit maajimut amerlanerusunik unnuisoqarsimammat siumukarneq erserpoq.

Hotel Qaqortoq nunguutsisoq
Avannaaniinnaanngilarli aasaanerani unnuiffissat ulikkaaqqanerat. Aamma Qaqortumi ukioq manna takornariaqarfiulluarniarpasilereerpoq.

Hotel Qaqortoq aasaanerani ulikkaavissallutik Sermitsiaq.AG-mut oqaluttuarpoq. Maannalu aqutsisuisa isumaliuutigaat akunnittarfik allilertorneqassanersoq.

Powered by Labrador CMS