politiit
Akunnerni 37-ni sulerusuppugut
Kalaallit Nunaanni naalagaaffimmi atorfillit Danmarkimi suleqatiminit sapaatit akunneranut akunnernik pingasunik amerlanerusunik sulisarnissaat naapertuuppa? Politiit peqatigiiffiat taama isumaqanngilaq, sapaatillu akunneranut akunnerni 37-ni sulisarnissaq pillugu oqallinneq uummarissarlugu
Politiit sulinerminni nalingiinnerusumik atugaqarnissartik kissaatigaat.
Tamanna Kalaallit Nunaanni Politiit Peqatigiiffiani KNNP-mi siulittaasup Jesper Fleischerip erseqqissarpaa sapaatit akunnerani kingullermi politiit nunaqavissut tikisitallu akornanni akissarsiat assigiinnginnerat pillugu AG-mi allaaserisamut qisuariaatitut.
Taamaallaalli akissarsiatigut tapisiatigulli ajortoqanngilaq. Aamma sulinerup sivisussusaa tassaavoq politiit akornanni oqallissutaasoq, Jesper Fleischer erseqqissaavoq:
Atuaruk: Politiit kattuffiat: Politiinut ataqqinninneq minnerulersimasoq
- Ukiut ingerlaneranni naalagaaffimmik isumaqatigiinniarnerpassuit ingerlanneqartarsimapput kikkut tamarmik assigiinnik atugaqarnissaat siunertarlugu. Piumasaqaatigiuagatta ilagaat sapaatit akunnera suliffiusoq akunnerit 37-iussasoq soorlu Danmarkimi Savamilimmiunilu taamaattoq. Tamannali itigartitsissutigineqartarpoq, Jesper Fleischer oqarpoq.
Danskit naalagaaffiata allat taamaasiulernissaat aarleqqutigalugu itigartitsisimasut taanna oqarpoq.
- Qallunaat naalagaaffiata sapaatit akunnerata suliffiusup 37-inik akunneqarnissaannik itigartitsinerata peqqutigaa suliffeqarfiit allat taamaattunik piumasaqalersinnaanissaat, Jesper Fleischer oqarpoq.