Akulerutsitsineq pitsanngorsarneqassaaq

Akulerutsitsinermut nammineq inatsiseqalernissaq, inunnut Kalaallit Nunaanni najugaqareersunut imaluunniit nuuttunut sammitinneqartoq.

Ilinniartitaanermut, Ilisimatusarnermut Ilageeqarnermullu Ataatsimiititaliap isumaqatigiissup tamanna kissaatigaa. Ataatsimiititaliap Naalakkersuisut kajumissaarpai nassuiaammik suliarititseqqullugit.

Allannguutissatut siunnersuut pineqarpoq, tassa Juliane Henningsenip, IA, upernaakkut ataatsimiinnermi siusinnerusukkut akulerutsitsineq pillugu nassuiaateqaqqusinikuummat. Taassuma qulaajarneqaqquvaa oqaatsinut politikki naammaginartumik taaneqarsinnaasumik sunniuteqarnersoq. Kiisalu Kalaallit Nunaanni inuiaqatigiinni pissutsit, kulturi, ileqqut kiisalu isumaginninnermi atukkat naleqartitallu pillugit ilisimasaqalernissamut taamatut malittarisassiornissamut pisariaqartitsisoqarnersoq.

Ataatsimiititaliamut allannguutissatut siunnersuut pingaarnertigut tassunga assinguvoq.

Ataatsimiititaliap inassutigaa inunnut Kalaallit Nunaannut nuuttunut inuttut kulturikkullu akulerutsitsinissamik maanna suliniutit pillugit Naalakkersuisut nassuiaateqassasut. Tamanna peqatigalugu nalilerneqassapput inunnut Kalaallit Nunaanni najugaqareersunut ataasiinnarmik oqaasilinnut maanna suliniutigineqartut - taamatuttaaq isumaginninnermit kulturikkullu isigalugit.

Misissuineq, inassuteqaammi allassimasutut "siunissami akulerutsitsinermut inatsisissaq isumaliutinik arlalinnik imaqassaaq, inunnut Kalaallit Nunaannut nuuttunut suliniutinik, kiisalu inunnut Kalaallit Nunaanni najugaqareersunut ataasiinnarmik oqaasilinnut suliniutinik".

Siunnersuut marlunngorpat Inatsisartuni aappassaaneerneqassaaq.