Køreplan
Akulerutsinneqarlusilu tusaaniarneqartalissaasi
Aatsitassanik suliniutini paasissutissat innuttaasullu akulerutsinneqartarnerisa qanoq siuarsarneqarnissaannik inassuteqaatitut saqqummiussat arlallit Naalakkersuisut akuersissutigeqqammerpaat
Aatsitassanik suliniuteqartoqaraangat paasissutissiinerit pitsaanerusut - innutaasullu annertunerusumik akulerutsinneqartarnerat. Tassa Naalakkersuisut nutaat anguniagaat. Siunertallu pitsaasut qanoq isilluni piviusunngortinneqarnissaannik saqqummiussat sisamanngormat Naalakkersuisut akuersissutigaat.
Inassuteqaatillu assigiinngisitaarput, aatsitassarsiornermik selskabit qanoq isillutik suliniumminnik pitsaanerusumik paasissutissiisinnaanersut - tusarniaanerit qanoq nutaamik ingerlanneqarsinnaasut aammalu workshopinik ingerlatsisarneq, tamatumani immikkut ilisimasallit oqaloqatigineqarsinnaatillugit.
Inassuteqaatit isigineqassapput suliniutissatut atorneqarsinnaasutut periarfissatut, aatsitassanik suliniutissani innuttaasut akulerutsinneqassagaangata. Suliniummi immikkoortoq tulleq tassaassaaq inassuteqaatit qanoq isilluni piviusunngortinneqassanersut. Suliamut tamatumunnga atatillugu soqutigisaqaqatigiit arlallit suliami peqataanissamut qaaqquneqassapput.
- Saqqummiussaq tulluusimaarutigaara. Qinersineq sioqqullugu kingornatigullu sorsuutigisimavarput aatsitassanik suliniutit ammanerulernissaat oqallisigineqartarnissaallu. Saqqummiussakkut pitsaasorujussuarmik tunngavissaqalersimavugut qanoq isilluta innuttaasut pitsaanerpaamik akulerutsissinnaanerivut, inuussutissarsiornermut aatsitassanullu Naalakkersuisoq Jens-Erik Kirkegaard oqarpoq. Jens-Erik Kirkegaard oqarpoq inassuteqaatit atorneqariissasut Qeqertarsuatsiaat eqqaanni True North Gems-ip rubininik suliniutaata tusarniaavigineqarnerani.