Arbejdsgange

Akuersissutit oqartussaaffiit arlallit aqqusaartarpaat

Aalisarnermut akuersissummik qinnuteqaatip tunniunneqarneraniit aalajangiinissap tungaanut sivikinnerpaamik ullut pingasut ingerlasarsinnaapput

Aalisarsinnaanermut akuersissutit sivisuumik utaqqineqartarsinnaapput, qinnuteqaatit allaffiit arlallit aqqusaartarmatigit.

Sooruna qaleralinnut saarullinnullu akuersissutinik tunniussiniartarneq taama arriitsigisoq?
Taamatut paragraf 37 naapertorlugu Naalakkersuisunut apeqquteqarpoq Siumut tunuliaqutaralugu Inatsisartunut ilaasortaq Kristian Jeremiassen. Taanna takkajaamik akineqarpoq, tassa akuersissutit imaasiallaannaq pineqarsinnaanngimmata. Akuersissutit allaffiit arlallit aqqusaaqqaassavaat aalajangiisoqartinnagu qinnuteqaat akuerineqassanersoq.
– Innuttaasup kissaatigippagu sinerissamut qanittumi saarullinniarluni qaleralinniarlunilu aalisarnermut aalisarsinnaanermut akuersissummik qinnuteqarniarluni pineqartoq siullermik kommunimut saaffiginnissaaq. Tassani kommunimi inuussutissarsiornermut siunnersorti suleqatigalugu qinnuteqarnissamut immersugassamik immersuissaaq. Tamatuma kingorna qinnuteqarnissamut immersugassaq CPR-nalunaarsuiffimmut kiisalu Akileraartarnikkut oqartussaasunut nassiunneqassaaq, taakkulu uppernarsassavaat, qinnuteqaatikkut paasissutissat saqqumiunneqartut eqqortuunersut. Kiisalu qinnuteqarnissamut immersugassaq Aalisarnermut, Piniarnermut Nunalerinermullu Naalakkersuisoqarfimmut inaarutaasumik suliap suliarineqarnissaanut nassiunneqassalluni. Naalakkersuisoqarfimmit qinnuteqaatip tiguneraniit nalinnginnaasumik ullut suliffiusartut pingasut missaat ingerlaqqaartarput, qinnuteqaateqartumut akissuteqaammik nassiussisoqannginnerani. Piffissarli sivisungaatsiartoq ingerlaqqaarsimasinnaasarpoq qinnuteqaatip Aalisarmut, Piniarnermut Nunalerinermullu Naalakkersuisoqarfimmut apuunniarnerani, tamannarpiarlu pissutaasarpoq innuttaasut ilaannut piffissap sivisuup ingerlaqqaartarneranik misigisarnerinut qinnuteqaamminnut inaarutaasumik akissutisinissaminnut, aalisarnermut, piniarnermut nunalerinermullu Naalakkersuisoq Karl Lyberth akissuteqarpoq.
Taassuma ilanngullugu paasissutissiissutigaa piffissami 2013-imi apriilip 5-anniit 3013-imi oktobarip 25-iannut sinerissamut qanittumi saarullinniarsinnaanermut akuersissutit 413-it, sinerissamullu qanittumi qaleralinniarsinnaanermut akuersissutit 154-it tunniunneqarsimasut. Tassa piffissami Naalakkersuisut nutaat atuuffianni.
– Taakkunannga 180-it siusinnerusukkut saarullinniarsinnaanermut akuersissuteqarsimanngillat, 71-illu siusinnerusukkut qaleralinniarsinnaanermut akuersissuteqarsimanatik. 2013-imi apriilip 5-anniilli sinerissamut qanittumi saarullinniarsinnaanermut qinnuteqaatit sisamat itigartinneqarput, kiisalu inuusuttunut 25-t inorlugit ukiulinnut sinerissamut qanittumi qaleralinniarsinnaanermut qinnuteqaatit 29-t itigartinneqarlutik.

Powered by Labrador CMS