Aalisarneq
Akuersissutinut suliassarpassuit aalisartunut akisunaartitsipput
Aalisarnissamut akuersissutit suliarineqartarnerisa sivisunerujussuata kingunerisaanik aalisartut hunnorujulikkaat aningaasanik annaasaqarput. Akuersissutinut qinnuteqaatinik suliaqartartutuaq feeriarpoq. Immikkoortoqarfik akuersissutinik 600-t missaanniittunik suliassaqarpoq, sulisunik annaasaqarsimaneq pissutaalluni.
Aalisartoq 63-inik ukiulik Tage Siegstad Ilulissaneersoq ukiut 40-t sinnerlugit aalisartuusimasoq maanna isertitaqanngilaq, tassami pujortuleeqqaminik saarullinniarnissaminut akuersissutini utaqqivaa. Taassuma qinnuteqaatini juunip naajartorneranili nassiussimavaa.
- Ukiut 40-t sinnerlugit aalisartuuninni aatsaat taama ajortigisumik misigisaqarunarpunga. Allaanngilaq kinaassusiiagaalluni. Ilukkut annernarpoq, Tage Siegstad Sermitsiaq.AG-mut oqaluttuarpoq.
Aalisarnermut Piniarnermullu Naalakkersuisoqarfimmit akuersissutinut qinnuteqaatit suliarineqartarnerannik kisimi misigisaqartuunani, taassuma naqissuserpaa.
Aamma atuaruk: Inuussutissarsiutigalugu aalisarnermut akuersissutit suliarinerannut tatiginninnginneq
Immikkoortoqarfik feeriarnermut eqqugaaqqasoq
Sivisuumik suliarineqartarnerannut naalakkersuisoqarfik ima nassuiaateqarpoq:
- Sulisoq akuersissutinik suliaqartartutuaq maannakkut feeriarpoq, taamaattumillu ajoraluartumik aalisarnermut akuersissutinik suliaqarneq kigaatsuararsuarmik ingerlavoq, aalisarnermut naalakkersuisoqarfimmi ataqatigiissaarisoq, Augusta Jerimiassen oqarpoq.
Ukiup naalerneraniilli akuersissutinik amerlasoorpassuarnik allaffimmi suliaqartartoq ataasiinnaasimasoq. Siornatigut sulisut sisamaasimagaluarput, kisianni pingasut assigiinngitsunik peqquteqarlutik atorfimminnit soraarsimapput.
- Akuersissutinut qinnuteqaatinik nutaamik suliaqartartussamik atorfinitsitsisoqarneranit ullut arlaqanngitsut qaangiupput, Augusta Jerimiassen oqaluttuarpoq, taanna toqqaannartumik qinnuteqaatinik suliaqartartussatut atorfinitsinneqarnikuunngikkaluarluni ikiuuttarsimalluni ilisimatitsivoq.
Akiligassanut malinnaasinnaajunnaartut
Naalakkersuisoqarfimmi suliassat amerliartuinnartut, aalisartoq Tage Siegstad aamma taama misigisimavoq. Taassumali akiligassat akilersinnaajunnaaleramigit amerliartorput.
Ilaqutariit illumut attartornermut aamma aningaaserivimmut atukkaminnut qaammammut 16.000 koruunit missaanni aningaasartuuteqartarlutik, taassuma oqaluttuaraa.
- Ilulissat eqqaanni juulimi bundgarninik saarullinniarneq isertitaqarfiginerpaasarparput. Isertitaqannginnera peqqutigalugu akiligassagut akilersinnaanngilakka. Tamannalu akuersissummik nutaamik pissarsinissama utaqqinerinnaanik pissuteqarpoq, Tage Siegstad ersarissumik pakatseqqasoq oqarpoq.
Pitsaanerusinnaasut
Qinnuteqaaterpassuit 600-t missaanniittut amerliartortut pitsaanerusumik suliarisinnaagaluarlugit, Aalisarnermut Piniarnermullu Naalakkersuisoqarfiup nassuerutigaa. Sulisoq nutaaq sulileriarpat aalisarsinnaanermut akuersissuteqartarfik ukiamut tamakkiisumik ingerlaleqqinnissaa, naalakkersuisoqarfiup neriuutigaa.
Tamatuma saniatigut aamma allaffik akuersissuteqartarfik ilinniartunik sulisoqarnissamut periarfissinneqarsimavoq, taakkulu akuersissutinut qinnuteqaaterpassuit suliarinissannut ikiuussinnaassapput.