urani avissaartuutsitsivoq
Akuersaanngilluinnarnermik oqallinneq aserorsaataasoq pisariaqarsimanngilaq
Paasiniaanikkut nutaakkut takutinneqarpoq uranimut akuersaanngilluinnarneq Kalaallit Nunaata akuersissutiginngisaannarsimagaa. Taamaattumik radiop qinngornerinut ulorianartut inerteqqutaalluinnarneq 2013-imi Inatsisartunit akuersissutigisariaqarsimanngikkaluarpoq
Aatsitassanik radiop qinngornerinik ulorianartunik akuersaanngilluinnarnerup atorunnarsinneqarnera, Inatsisartut 2013-imi akuersissutigisaat suli nunatsinni inuiaqatigiinni avissaartortitsivoq.
Oqallinnerli aserorsaataasoq pisariaqarsimanngikkaluartoq.
Gry Thomassenip, Dansk Institut for Internationale Studierimeersup, ilaatigut Naalagaaffiup pappiaqqanik toqqortaasiviani, Statsarkivimi, nutaamik misissuinerata uppernarsarpaa Kalaallit Nunaata uranimut aatsitassanullu radiop qinngorneranik akulinnut akuersaanngilluinnarneq akuerisimanngisaannaraa.
Akuersissuteqartoqanngippallu atorunnaarsitsisoqarsinnaanngilaq.
Ataatsimut Isumasioqatigiissitaliaq pisuutippai
Aatsitassat radiop qinngorneranik akullit oqallisigineqarneranni Kalaallit Nunaanni Aatsitassat pillugit Isumasioqatigiissitaliaq pingaarutilimmik inissisimasimavoq.
Ataatsimut Isumasioqatigiissitaliaq atuuppoq 1979-imi maajip aallaqqaataanit namminersornerullutik oqartussat eqqunneqarneranni, 2010-milu januaarip aallaqqaataani namminersulernerup kingorna Kalaallit Nunaata aatsitassanut oqartussaaffimmik tigusinerata tungaanut. Ataatsimut isumasioqatigiissitaliami ilaasortaapput qallunaat politikerit tallimat kalaallillu politikerit tallimat, kiisalu siulittaasoq dronningimit toqqarneqarsimasoq. 1979-imi siulittaasoq siulleq tassaavoq Jonathan Motzfeldt, 2009-milu kingulliulluni siulittaasuulluni Venstremeersoq Kim Andersen.
Ataaatsimut Isumasioqatigiissitaliap Kalaallit Nunaanni aatsitssarsiornermik ineriartorneq malinnaaffigaat, taakkualu aatsitassanik ujarlernermut atatillugu apeqqutinut tunngaviusunut, aammalu misissueqqaarnissamut, ujarlernissamut aatsitassanillu atuinissamut Nunatsinni Naalakkersuisunut qallunaallu naalakkersuisuinut inassuteqartarput.
00-ikkunni tusaamaneqalerpoq ataatsimut isumasioqatigiissitaliat aatsitassanut uranimik akulinnut akuersaanngilluinnarneq akuersissutigisimagaat.
Oqaluttuaq tamaat tusaamasarlu tamanna qanoq pilersimanersoq, Sermitsiami kingullermik saqqummersumi atuaruk. Aviisi pisiariuk uani: