AktieTips 2014-imi ajugaasoq paasisimasaqarluartoq

Aktiespil-imi, Grønlandsbankip aviisi Sermitsiaq suleqatigalugu aaqqissuussaani, peqataasunit 605-init maanna sapaatit akunneri arfinillit ingerlareersut ajugaasoq nassaarineqarpoq.
Tassaavoq Magne Flem, taannalu aktiat ineriartornerannik malinnaasimavoq Børsen.dk-mi, Euroinvestor.dk-mi tusagassiorfitsigullu assersuutigalugu CNN-imi aamma Dgens Næringsliv-imi. AktieTipsimi ukiuni kingullerni pingasuni peqataasartutut Magnep paasisimavaa unamminermi ajugaaniassagaanni misissuisarneq pitsaanerusoq iluatsitsinissaq isumalluutiginagu.
– Qaqugumulluunniit peqataasassaanga. Spili tiguartinnarpoq pissanganarami aktianillu tuniniaaviit ineriartornerat siulittorniarsaralugu. Unamminerup ingerlanerani assersuutigalugu takusinnaasimavara tuniniaavik tamarmiusoq appariartortoq Ukraine-mi eqqissiviilliornerit pissutigalugit. Taamatuttaaq Kinamit ukiumut naatsorsuutit pitsaanngitsut saqqummiunneqarput, tamannalu Mærsk-ip aktiaanik pitsaanngitsumik sunniuteqarpoq - Mærsk nunamut tassunga tassanngalu nioqqutissanik assartuisarpoq, Magne Flem oqaluttuarpoq.
873-inik pointinnalluni Magne Flem tullersortiminit 154 pointinik siuarsimaneruvoq. Magnep akissarsiassat pingaarnerit 10.000 koruunit pissarsiarai, Runde 2-mi siuariarnerpaatut 2.000 koruuninnalluni, aammalu Runde 3-mi akissarsiassat aappaat pingajuallu pillugit 1.250 koruuninnallumni.
Unamminermi akissarsiassap tullia 5.000 koruuniusoq Rene Jørgensenimit pissarsiarineqarpoq, taanna 719 pointinnassimalluni, pingajuallu 2.500 koruunit Brutus-imit, 699 pointinnattumit, pissarsiarineqarluni.