Aktiespillerneq

Aktie-Tipsimi ilisimasaqarneq kuultitut naleqarpoq

Siorna Aktie-Tipsimi ajugaasup, Magne Flemip, unammeqataasussat unammisitsinermi aktiaatileqatigiiffinnut ilaatinneqartunut 13-inut tunngatillugu paasissutissanik ujarlernissaat kaammattuutigaa

Aktie-Tipsernermi Magne Flem ukioq kingulleq ajugaavoq

Ilinniagaqarneq erlinnartuutaasoq ussatitoqqaniipoq. Magne Flemimullu, Grønlandsbankenip 2014-imi aktianik unammititsinerani AktieTipsimi ajugaasumut tunngatillugu, tamanna eqqorluinnartuuvoq.

Aviisinik atuarnermigut tusagassiuutinilu allani malinnaanermigut, Nuummiup taassuma unammeqataasunit allanit 600-nik amerlassuseqartunit, aktiat 13-it unammissutaasut taakku qanoq ineriartornerat eqqoriarluarnerpaavai.

Taamatut aallussilluarneq ilaatigut eqqugassamik annerpaamik nassataqarlunilu, eqqugassanik allanik eqquinermik nassataqarpoq, taamaalillunilu equkkat katillugit 13.250 koruuninik annertussuseqarput.

- Aningaasat feriassutigineqarput, maannalu ukioq manna unamminissamut ilanngutereerpunga, misilittagartooq taanna maanna sisamassaanik peqataasoq oqarpoq.

Iluatsitsinissamullu periusissaq siorna atukkamut assingussaaq.

- Assersuutigalugu Volvop aktiaataa ukioq manna ilaasoq takusinnaavara. Tassungalu tunngatillugu svenskit inuussutissarsiornermut aviisiat Dagens Næringsliv, suliffeqarfinnut taamaattunut tunngatillugu, danskit tusagassiorfiinit sukumiinerusumik nutaarsiassanik saqqummiussisartoq malinnaaffigissavara. Taassumalu saniatigut ingerlatseqatigiiffimmi susoqarnera malinnaafigissavara, Magne Flem nassuiaavoq.

Siorna unammisitsinerup nalaani svenskit atisanik nioqquteqarfiata Hennes og Mauritzip aktiaataa tassanngaannaq qaffariarujussuarpoq. Dagens Næringslivimili malinnaalluarnermigut unammeqataasup sooq taamaattoqarnera paasivaa.

Taamatuttaarlu aktiat nalinginik saqqummersitsivissuarni, soorlu Amerikami Dow Jonesimi malinnaanissaq sunngiffimmini pappiaqqanik nalilinnik niuertorsuup kaammattuutigaa.

- Aktianik niuerfissuit imminnut sunniivigeqatigiittarput, taamaalillunilu Amerikami niuerfiit Asiami niuerfinnut sunniisarlutik, taakkulu Europamiut aktiaataannut sunniisarlutik, Magne Flem erseqqissaavoq.

Nammineq aktiaatit
Aktie-Tipsimi peqataajuartoq ukiorpaaluni nakorsaasiorfiup aktiaataanik pigisaqarpoq. Tassungalu atatillugu aningaasaliissagaanni aalajangersimasumik malitassiaqanngitsoq oqaatigaa.

- Aktia aalajangersimasoq asannilersoorfiginagu, aningaasaliissutit siaruartarnissaat oqaatigineqartarpoq. Taamaaliunngilangali, akerlianilli nakorsaasiorfimmut aalajangersimasumut aningaasaliivunga. Tamannalu aningaasaliissutit iluatsinngikkunik aningaasat annaanissaannik aallaaveqarluni iliuuseqarneruvoq. mannali tikillugu ajunngilluinnartumik ingerlasoqarpoq, Magne Flem erseqqissaavoq.

Ukioq manna Aktie-Tips marsip aappaanni aallartippoq, unammisitsinerlu qaammat ataaseq ingerlassalluni. Aktiat 13-it malinnaaffigineqaqqissapput. Ukioq mannalu inuit ilinniakkamik ingerlatsisut unamminermik soqutiginninnissaat Grønlandsbankenip siunniuppaa.

Aningaaseriviup eqqugassanngortitaanit 25.000 koruuninit, 17.000 koruunit atuaqatigiiaat ilinniartoqatigiilluunniit eqqugassaasa annersaannut, tullianut pingajuannullu atorneqassapput.

Pisarnerlu naapertorlugu unammisut allat aamma eqqugassaqartinneqassapput, tassanilu sunngiffimminni pappiaqqanik nalilinnik aningaasaliisartut amerlanerpaasarput. Taakkununngalu eqqugassat annersaat 5.000 koruuniussaaq, tullia 2.500 koruuniussalluni, pingajuallu 1.000 koruuniussalluni.
Grønlandsbankenip unammisitsineq 13-issaannik ingerlappaa. Pisarnerlu naapertorlugu AktieTips Sermitsiaq suleqatigalugu ingerlanneqassaaq.

Unamminermi najoqqutassat www.aktietips.gl-imi takusinnaavatit.

Unamminermut peqataaneq aningaaserivimmik atuisuuneq atuisuunnginnerluunniit apeqqutaatinnagu akeqanngilaq.

Powered by Labrador CMS