"Akornatsinniittut - Tarratta Nunaanni" Australiamukalerpoq

Marc Fussing Rosbachip filmiliaa Winda Film Festivalimi, Sydney-mi Australiami ingerlanneqartussami takutinneqartussanngorpoq.

"Akornatsinniittut - Tarratta Nunaanni" Australiamukalersoq.

Taamaasilluni Marc Fussing Rosbach kalaallini filmiliortuni siullersaalluni filmiliaminik, ”Akornatsinniittut – Tarratta Nunaanni”-mik takutitsisussatut qaaqqusaavoq.

Marc Fussing Rosbach filmiliap suliarinerani kisiinnangajammi suliaqartuuvoq.

Filmi angallanneqangaatsiartussanngorpoq. Tassami Winda Film Festival, Sydney-mi Australiamiippoq, nunatsinniillu tikissagaanni ulluni pingasuni angalasariaqarpoq, siumut utimullu 26 tiiminik sivisutigisumik timmisartoqqaarluni tikitassaalluni.

Film festival novembarip 25-ani ingerlanneqassaaq.

Filmi tusaamasaq

Winda Film Festival 2016-imi pilersinneqarpoq, tassanilu nunap inoqqaavi Australiameersut nunarsuullu sinneraneersut nersorniarneqartarlutik.

Marc Fussing Rosbachip filmiliaa ImageNative Filmfestivalimi Torontomi Canadami oktobarimi ingerlanneqartumi takutinneqarmat, Australiamit film festivalimik aaqqissueqataasoq isiginnaaqataavoq.

- Taassuma (Winda Film Festivalimik aaqqissuisoq, aaqq.) filmi takugamiuk tinguartingaatsiarpoq, ingerlaannarlu allaffigivaatigut aperaluta filmfestivalertoqalerpat peqataasinnaanersugut, Ane Lena Fussing Rosbach, filmiliami ingerlatseqataasoq (executive producer) oqaluttuarpoq.

Marc Fussing Rosbachili filmiliamik allamik suliaqalereermat Ane Lena Fussing Rosbach filmfestivalimut sinniisutut peqataassaaq. Taanna oqaluttuarpoq filmfestivalimi filmiliap kingullersaalluni takutinneqarnissaa pingaaruteqarluinnartuusoq.

- Filmfestivalimi kingullersaalluni takutinneqassagami tamanna immikkut ataqqinaaterujussuuvoq, Ane Lena Fussing Rosbach oqaluttuarpoq.

Angajoqqaat tulluusimaartut

Ane Lena Fussing Rosbach filmimik suliaqartumut, Marc Fussing Rosbachimut aamma anaanaavoq. Ernermi suliaata isiginnaartunit tigulluarneqartarnera nuannarineqarluarneralu angajoqqaatut tulluusimaarutigaa.

- Ernera tulluusimaarutigeqaara. Tanngassimaarnaqaaq suliai nersorniarneqartarmata. Ataqqinaataavoq, oqarpoq.

Powered by Labrador CMS