qimmit nappaataat
Akiuussutissanik Saqqamut Qeqertamullu nassiussisoqarpoq
Qimmit nappaataannut akiuussutissat nunaqarfinnut tikiunneqassapput tallimanngorpat arfininngorpallu
Kalaallit Nunaanni Uumnasunut Nerisassanullu Oqartussaqarfik Qaasuitsullu Kommunia isumaqatigiissuteqarput kapuutinik qimmit nappaataannut akiuussutissanik Saqqamut tallimanngornerup ingerlanerani, Qeqertamullu arfininngornermi, timmisartuussisoqassasoq.
Taamatut paasissutissiipput Namminersorlutik Oqartussat.
Pinaveersaartitsineq
Tamatuma saniatigut Ilulissani uumasut nakorsaata kommunimi akisussaasut ilitsersorsimavai pinaveersaartitsinermik suliniutinik aallartitseqqullugit, nappaallu siammatsaaliorniarlugu akiuussutissanik kapuuinermut periusissioqqullugit.
Toqunneqassapput
Qimmit akiuussutissamik kapoorneqalinnginneranni qimmit nappaartillit tamarmik immikkoortinneqassapput toqunneqarlutillu. Qimmit angalaaginnartut pitunneqassapput imaluunniit ungaluusivimmiitinneqassallutik, qimmeqatigiillu tamarmik immikkoorsimatinneqassapput. Qimmit pigineqanngitsut angalaaginnartut toqunneqartassapput, Namminersorlutik Oqartussat erseqqissaapput.
Qimmiutillit ilitsersussavaat
Kapuuineq imatut ingerlanneqartassaaq: Nunaqarfinni assigiinngitsuni kommunip qimminut inspektøriisa akiuussutissat paarineqarnissaat qimmiutilinnullu tamanut agguaanneqarnissaat akisussaaffigaat. Qimminut inspektørit qanoq kapuuisoqarnissaanik qimmiutillit tamaasa ilitsersortassavaat.
Sapaatit akunneri pingasut
Namminersorlutik Oqartussat erseqqissarpaat sapaatit akunneri pingasut aatsaat qaangiutereerut akiuussutissaq sunniuteqalersartoq, taamaattumillu oqartussaasut inassutigaat qimmit peqqissut akiuussutissamillu kapineqarsimanngitsut, piaarnerpaamik akiuussutissamik kapoorneqassasut.